'Turuleka oiloa' filma emango dute hilaren 29an
Zinegileak Kultur Elkarteak antolatu du familientzako emanaldia, Abaraxka ludotekaren eta Oiartzungo Udalaren laguntzarekin.
Egun berezia da otsailaren 29a, lau urtean behin gertatzen delako. Oiartzungo Zinegileak Kultur Elkarteak familientzako egun berezia izatea nahi du. Izan ere, film emanaldia antolatu du egun horretarako.
Turuleka oiloa emango dute egun horretako arratsaldean. Saioa 17:00etan hasiko da, eta sarrerak hiru euroko prezioa izango du. Abaraxka ludoteka eta udalak Zinegileak elkartea lagundu dute ekitaldia aurrera eramateko.
Filmaren sinopsia.
Turuleka oso oilo berezia da. Itxura xelebrea duelako eta arrautzarik errun ezin duelako, beste oiloek barre eta iseka egiten diote… harik eta halako batean, Ixabelek, musika andereño erretiratu batek, bere baserrira eramaten duen arte, berekin bizitzera. Hantxe, adiskidetasun giroan eta zoriontsu, oiloak bere dohain ezkutua aurkituko du: Turu-k hitz egin dezake! Eta badaki abesten ere, izugarri ondo gainera!
Gure laguntxoa, bere musikarako dohain zoragarriari esker, Daedalus zirku handiko izar bihurtuko da. Bitarteko bidaia ez da batere erraza izango, ordea, Damian Maltzur gaiztoak beretzat hartu nahi baititu zirkua… eta Turuleka harrigarria.
