Zeelanda Berria Gaztañora
Maori herriaren eta bere hizkuntzaren biziberritzea bertatik bertara ezagutzeko aukera izan zuen Imanol Miner Aristizabal euskal filologoak 2003-2004 urteen artean egindako urtebeteko egonaldian. Beste bitan itzuli da bertara, azken aldiz duela bi urte, eta prozesu horrek hamalau urtean izan duen bilakaeraren berri lehen eskutik jaso du.
Gaztañoko Sorguneak hitzaldiak antolatzen jarraitzen du. Oraingoan Zeelanda Berriraino, Aotearoaraino maorieraz, egin du jauzi. Maori herriaren eta bere hizkuntzaren biziberritzea bertatik bertara ezagutzeko aukera izan zuen Imanol Miner Aristizabal euskal filologoak 2003-2004 urteen artean egindako urtebeteko egonaldian. Beste bitan itzuli da bertara, azken aldiz duela bi urte, eta prozesu horrek hamalau urtean izan duen bilakaeraren berri lehen eskutik jaso du. Esperientzia horren berri emango du bihar Gaztañoko auzo elkartearen egoitzan, 19:00etan hasita, Maoriak Aotearoa/ Zeelanda Berria ispilu bat gure antipodan hitzaldiaren barruan.
Euskal Filologian lizentziatua da Miner, eta Hizkuntza Plangintza Ikasketak ere egin zituen Hiznet gradu ondokoan. Euskal Kulturgintzaren Transmisioa aditu titulua du, eta 2018an berriz, Gizarte Antropologia masterra egin zuen EHUn. Hizkuntza teknikaria da lanbidez, eta lan munduan euskalduntzen dihardu 2004aqz geroztik.
Martxoko hitzaldiaren berri ere eman dute antolatzaileak. Datorren hileko hitzaldia Ahoztar Zelaietaren eskutik helduko da. Martxoaren 3an izango da eta Euskal Fariña iaz argitaratu zuen liburuaz mintzatuko da. Ikewrketa kazetariak Euskal Herrian dauden narkotrafiko sareen funtzionamenduaz hitz egiten du bere liburuan, baita horiek polizia, politiko eta bankeroekin duten harremanak. Kasu hauen gainean dagoen inpunitate judizialari ere egiten dio aipamena. Horiek guztiak lehen eskutik kontatuko ditu Zelaietak.