Berdintasuna helburu, mozio berezia aurkeztu du PSE-EEk
Martxoaren 8ari begira Lezoko PSE-EEk mozioa aurkeztu du udaletxean, hurrengo osoko bilkuran azter dadin. Besteak beste lan arloko berdintasun lege bat eskatuko diote Espainiar Estatuko gobernuari.
Prostituzioa, gizaki salerosketa eta indarkeria matxista Lezon onartuak ez izatea nahi du PSE-EEk. Hori da alderdiaren helburu nagusietako bat berdintasunari dagokionez, Joxean Sanchez zinegotziaren arabera. Sanchezek martxoaren 8ari begirako mozioa aurkeztu du gaur, hurrengo osoko bilkuran azter dadin, “gizartean berdintasunean sakontzeko eta denen eskubideak eta parte hartzea bermatzeko, Lezoko Udalak ekarpenak egin behar ditu”. Gainera, indarkeria matxistaren biktimen erreparazioan sakontzen jarraitzeko beharraz ohartarazten du mozioak.
Lezoko mugetatik kanpo ere eragiten du mozioak, lan arloko berdintasun lege bat sortzeko eskatuko diote ere bai Espainiar Estatuko gobernuari. Eskaera honen xedeak dira, kontziliazioa, lan baldintzen berdintasuna eta Nazioarteko Lan Erakundearen 189. hitzarmenak agindutako etxeko lanen duintzea.
Gaur gaurkoz, Lezoko Udalak berdintasunetik politika egiteko duen tresna nagusia, II. Berdintasuna Plana da; PSEtik baina, hura berritzen hasteko garaia dela diote. Horrekin batera, alderdiak beste bi eskaeren berri eman du: Lezoko Udalak ‘Herri Mailan, Emakume eta Gizonen Arteko Berdintasuna Sustatzeko Europako Gutunarekin’ bat egitea eta berdintasuna helburu duten programa eta egitasmo gehiagori babesa ematea.