Victor Fernandez Otxoa gogoan, gerra zikinan tirokatu eta 39 urtera
Lezoko ezker abertzaleak aldarrikatu du Fernandez Otxoa ez dela bigarren mailako biktima bat. Tiroketak tetraplegiko utzi zuen.
1981ko otsailaren 27an, Tejeroren estatu kolpe saiakera izan eta lau egunera, Batallon Vasco Españolek Victor Fernandez Otxoa lezoarra tirokatu zuen lan egiten ari zen Benta Berri tabernan, Hernanin. Lezoarraren kontrako ekintzak tetraplegiko utzi zuen.
BVE taldea oso aktibo zegoen garai hartan. Hernanin bertan lau lagun hil zituen, eta Fernandez Otxoaren tiroketatik hiru egunera, Jose Ramon Ansa hil zuten Andoainen. Hurrengo egunean atxilotu zituzten Ladislao Zabala Solchaga eta Ignacio Iturbide Alkain.
Lezoko ezker abertzaleak ohar batean gogorarazi duenez, Fernandez Otxoaren bizitzako azkeneko hamalau urteak “kalbario” bilakatu ziren, nahiz eta aldarte onari eusten zion.
“Victorren emazte Margarik eta seme Oskarrek gertutik bizi izan zituzten urte haiek guztiak, egoerari aurre eginez eta Victorrekin batera sufrituz. Margariri, Victor hil eta gutxira, hezurretako minbizia diagnostikatu zioten eta handik 3 urtera hil zen”, gogorarazi du ezker abertzaleak.
Nabarmendu dutenez, Fernandez Otxoak Iturbe eta Zabalaren aurkako epaiketan egon nahi izan zuen. “Oskarren hitzetan”, zehaztu du talde politikoak, “nabarmenak izan omen ziren epaituak eta zaintzen zieten polizien arteko harreman ona eta epaituek azaldu zuten harrokeria eta oilarkeria”.
Victor Fernandez Otxoa tirokatu zuteneko 39. urteurrenaz gain, salatu dute Euskal Herrian lehenengo eta bigarren mailako biktimak ezarri nahian ari direla batzuk. “Ez dugu nahi Victorri [Fernandez Otxoa] gertatutakoa ahazterik nahi. Victor lezoarrontzako ez zen bigarren mailako biktima izan eta hori gaurko egunera ekarri nahi dugu”.