Andaluzia etxera ekarri dute Donibaneko erretiratuek
Donibaneko helduenek badakite ongi pasatzen. Urtero legez dena emango dute inauterietan. Luisma Laboak eman die beste behin hasiera jaiei, umoretsu. Egun handia ordea, bihar izango dute.
Sevillako kutsua hartu du gaur Donibaneko aiton-amonen aterpeak. Inauteriek ez dute adinik. Ongi baino hobeto dakite hori Donibaneko aiton-amonen aterpean. Gaur eman diete hasiera erretiratuek inauteriei Donibanen eta haien gaiari jarraiki ospatuko ditu herri osoak aurtengo inauteriak. Gaur edo bihar Donibanera bertaratzen direnak azkar asko jakingo dute zein den aurtengo jaien gaia Sevillanek pista ederra ematen baitute.
Gaia baino, nazio oso bat da, Andaluzia aukeratu baitute aurten Donibaneko inauteriak girotzeko. Seriotasunez hartu dute, aiton-amonen aterpeak, Sevillako azokaren karpa baten itxura hartu baitu, bertako jantziekin agertu du, batzuk oso oso dotoreak. Zezen bat ere sartu da eta banderaren zaindari eduki dute.
Aurten ere hutsik egin ez duena, Luisma Laboa izan da, hark irakurri baitu bakarrizketa kutsua hartu duen pregoia. Ez da bakarrik izan, ‘La Kili-Kili’ eta ‘Robu’ bere alboan izan ditu eta. Euskal Herria eta Andaluziaren arteko ezberdintasunak eta antzekotasunak umorez errepasatu ditu, ikusleen barre algarak eraginez.
Loreto Osa, Pasaiako Udaleko zinegotzia eta Pasaiako adinekoen egoitzen presidentea, harrituta agertu da, Donibaneko erretiratuek inauteriekiko duten atxikimenduagatik, “mila mila esker benetan, urtean zehar egiten duzuen lan guztiagatik eta bereziki inauteriei begira egiten duzuenagatik”.
Banderaren igoerarekin itxi dute gaurko ekitaldia; Andaluziako bandera eta euskal ikurrina bateratzen dituen bandera. Jarrain otordua egin dute, biharko indarrak beharko dituzte eta.
HITZAk gaurko pregoiaren zenbait argazki bildu ditu.
