Bere ibilgailuan 192 marihuana landare zeramatzanean atxilotu dute
35 urteko gizon bat atxilotu dute Oiartzunen. Hurrengo egunean, Errenteria-Oreretako etxebizitza bat miatu eta 147 landare atzeman dituzte.
Segurtasun Sailak jakinarazi duenez, asteartean 35 urteko gizon bat atxilotu zuten Oiartzunen. 192 landare zeramatzan bere ibilgailuan. Ertzainak aspaldian zeuden bere atzetik, bere etxean aireztatze sistema bat zuelako, eta marihuana usaina ateratzen zelako.
Iturri berak esan duenez, hilabete erdialdean usain handia atera zela eta, poliziek susmoa zuten plantazio oso handia zuela, eta landareak oso hazita.
Asteartean atxilotu zuten, 192 landareak zabor poltsetan gordeta zituela. Epailearen baimena jasota, atxilotuaren etxea —Errenteria-Oreretan— miatu zuten, eta 147 landare aurkitu zituzten, baita 192 loreontzi ere. Horrez gain, lanparak, termostatoak eta haizagailuak aurkitu zituzten. Ertzaintzak uste duenez, etxebizitza landaketa lanetarako bakarrik erabiltzen zuen.
Errenteriako Udaltzaingoarekin aritu dira elkarlanean, eta epailearen eskuetan utzi zuten atzo.
