'Bakean dagoena bakean utzi' umore ikuskizunak 100. aldiz taularatuko dute
Mirari Martiarena oiartzuarrak eta Idoia Torregarai 2018tik dabiltza ikuskizuna Euskal Herrian oholtzaz oholtza eramaten. Udazkenerako, saio berria.
Badira ia bi urte Mirari Martiarena oiartzuarra eta Idoia Torregarai usurbildarra Bakean dagoena bakean utzi umore ikuskizuna taularatzen hasi zirenetik. Lankuk ekoiztua da. Hurrengo asteazkenean —hilak 11— 100. emanaldia eskainiko dute Bilboko Kafe Antzokian, 16:30etik aurrera.
Martiarena eta Torregaraik aitortzen dute bilatzen dutena dela, hain zuzen ere, izenburuak adierazten duenaren kontrakoa. “Izan ere, gauza batzuk ez badituzu astintzen ez dira aldatzen, eta horixe la lortu nahi duguna, aldaketa bat. Emakumeok umorea egin dezakegula frogatu nahi dugu alde batetik, oraindik ere gizonezkoen mundua baita hau eta aurreiritzi asko baitago”, esan dute.
Umorearen bitartez gai zehatz batzuk jorratu nahi izan dituzte: gorputzak, amatasuna, parranda, hilekoa… “Umorea kritika egiteko eta gauzak iraultzeko oso tresna eraginkorra da, eta hori baliatu nahi dugu barrearen bidez hausnarketa sustatzeko ere”, zehaztu dute.
Argi utzi nahi izan dute gizonentzako ere badela ikuskizuna, emakumeen kontuekin —”gure gauzekin”— barre egin dezaketela ikus dezaten. Eta hori bai: guztia euskaraz.
“Ametsa betetzen”
Oholtza asko zapaldu arren, ez dute ilusiorik galdu. “Bakean Dagoena opari bat izan da gu biontzat. Aspaldidanik egin nahi genuen elkarrekin umorearekin lotutako zerbait eta bi urteren ondoren amets bat betetzen ari garela esan dezakegu. Jende aurrean jartzen garen aldiro gozatzen dugu, egin nahi duguna egiten ari garelako, gozatu egiten dugulako eta jendearen erantzuna zoragarria izaten ari delako”, esan dute.
Emanaldi bakoitza ezberdina dela ziurtatzen dute, eta horrek inprobisatzeko aukera ematen duela zehaztu dute Martiarena eta Torregaraik. Lankurentzako esker oneko hitzak izan dituzte, beraiena bertsolaritza purua ez izan arren, haien aldeko apustua egin dute.
Udazkenerako beste lan bat prestatzen ari direla iragarri dute. Bakarrizketen formatuarekin oso gustura daudela ziurtatu dute, eta ildo horretan joango da datorrena. “Gure gaiak” landuko dituztela adierazi dute, eta Bakean dagoena bakean utzi-rekin izan duten poza errepikatzeko asmoz daudela jakinarazi dute.