Errefuxiatuen egoera salatuko dute etzi, Oarso Taldeak deituta
Turkiak Greziarekin duen muga ireki du, eta errefuxiatuak Europara iristen saiatu dira. Greziako poliziak oldartu eta haur bat hil da itota.
Siriako gerrako matxinoei laguntza ematen ari den Turkiak bere atzeko atea ireki du, eta gerra horretatik ihes egiten ari diren errefuxiatuei muga pasatzen utzi die. Horrela iragarri zuen pasa den astean, Errusiako eta Siriako armadek bigarren herrialde horretan turkiarrei eraso egin ondoren.
Greziak ostegun gauean itxi zituen mugak, eta Aitor Txabarri Berriako kazetariak azaldu duenez, egunero ematen ari dira migratzaileen eta Greziako militarren arteko gatazkak. Indarkeria horrek lehen biktima utzi du: Greziako uretan ontzi pneumatiko batean zihoan haur bat itota hil da. Greziarrek eta turkiarrek elkarri leporatzen diote hori gertatu izana.
Mugetako politika horrek sortzen duen egoeren kontra, Oarso Taldeak elkarretaratzea antolatu du datorren ostegunerako —hilak 5—. Niessenerako pasabide nagusian elkartuko dira, 19:00etan, Europa politika lotsagarrien lurraldea lelopean.