[Erreportajea] Erabiltzen ez bada, galtzen delako
Eskualdeko ingeles hiztunek zita garrantzitsua dute datorren ostiralean Errenteria-Oreretako Madison tabernan. Herritar batzuen ekimenez, lehenengo ingelesezko mintzapraktika saioa egingo dute, irekia.
Jaione Karrikiri eta Maialen Mendibil. Ingelesa ikastea handicap handia da herritar askorentzat. Are gehiago ikasitakoa gerora gogoratzea, freskotasun hori mantentzea. Bada, datorren astetik aurrera, William Shakespeareren hizkuntza berreskuratu eta praktikatzeko nahia dutenek aukera paregabea izango dute Errenteria-Oreretan. Lehenengo Speaking izeneko ingelesezko mintzapraktika saioa egingo dute ostiralean (hilak 13), 19:00etatik aurrera.
Jon Unzueta errenteriarra eta Maialen Mendibil oiartzuarra izan dira egitasmoa sortzeko apustua egin dutenak. Unzuetak azaldu du Donostian ingelesezko mintzapraktika egiteko ohitura handia dagoela, aspalditik biltzen direla astero, duela 20 urte hasi zirenetik. Unzuetak jada hamar urte eman ditu astero saio horietara joaten, ohitura bilakatu da harentzat. «Lehen egunetik oso gustura joan naiz. Pena da gure herrian horrelako talderik ez egotea, ingelesa hitz egiten dugun edo badakiten herritar asko garelako», azaldu du Unzuetak. Hutsune bat ikusi dute herrian, eta pixkanaka eskaera horri guztiari erantzutea izango da egitasmoaren asmo nagusietako bat.
Mendibil, berriz, duela bi urte murgildu zen lehenengoz horrelako saioetan. Oiartzuarrak ere eskualdean behar bat ikusi du, inguruan ingelesa praktikatu nahi duten asko daudela dio. «Helburu nagusia ingelesaren erabilera berreskuratzea da, bereziki egun daukagun maila hori mantentzea. Argi dugu hizkuntza bat ez bada praktikatzen galdu egiten dela, horregatik freskotasun hori mantendu nahi dugu, hitz jarioa behintzat ez galtzeko», azaldu du Mendibilek. Biek aitortu dute saioak beharrezkoak izan direla egun duten hizkuntza maila mantentzeko, eta herritar guztiak gonbidatu dituzte hilaren 13ko saiora, hitz egiteko duten abileziatik harago.
Ingeles maila altua dutenak, garai batean ikasi zutenek, edota egun ikasten hasi berri direnak. Denek izango dute txoko bat mintzapraktika saioan. «Mailak berdin du, hitz egin edota nahiago badute entzuteko aukera izango da, bakoitzak ahal duen moduan hartuko du parte», azaldu du Unzuetak. Hurrengo ostiraleko saioa elkartzen den jende kopuruaren eta horien mailaren arabera bideratuko dutela azaldu dute egitasmoaren sortzaileek. Momentuz ez dute gairik zehaztu, hortaz, unean sortutako eztabaidek gidatuko dute saioa. Ez da irakasle edo gidaririk izango, antolatzaileen arabera, saioak ez baitu kutsu akademikorik. Hori bai, atetik sartu orduko, soilik ingelesa erabili beharko dute partaideek, hori baita baldintza nagusietako bat. Saioak, orotara, ordubete inguruko iraupena izango duela zehaztu du bikoteak.
Jaione Karrikiri errenteriarra ere animatu da ostiraleko saioan parte hartzera. Beste asko bezalaxe, praktika falta du, baina gogoz dago berriz ere ingelesean trebatzeko. «Batzuek, nik tartean, oso maila baxua dugu. Batzuetan elkartu izan gara, baina serioki egin behar dela uste dugu, eta saioa aproposa izango da horretarako, helburu bakarra ingelesez aritzea baita. Ordubeteko esfortzu hori egitea garrantzitsua da», dio. Eta garrantzitsuena. Lotsak alde batera uzteko deialdia ere egin du Karrikirik. «Uste dut erridikulu maila altuegia dugula gehiegi menderatzen ez dugun hizkuntzekin, asko epaitzen dugula geure burua eta horrela ez dugu sekula beste hizkuntza berri bat ikasiko. Lotsak kendu behar dira, bai ala bai», gehitu du errenteriarrak.
Ostiraleko saioa Renfe geltoki pareko Madison tabernan izango da. Momentuz, hamar bat lagunek baieztatu dute euren presentzia, eta astebetean jende gehiago animatuko dela uste dute. Horregatik ere aukeratu dute Madison, jende gehiago animatuz gero, nahi adina espazio izan dezaten. «Zenbat eta jende gehiago, orduan eta hobeto, egitasmoari jarraipena ematea errazagoa izango da», gehitu du Mendibilek.
Donostian bezala, luzera begirako proiektua osatu nahi dute. 13koa lehena izango da, baina ez azkena. Izan ere, ez dute egitasmoa egun bakar batera mugatu nahi, eta hilabetero errepikatzeko asmoa dute. «Helburu txikiarekin hasiko gara, eta harreraren arabera erabakiko dugu noraino helduko garen, baina jada errepikatzeko prest gaude», dio oiartzuarrak.
Hilaren 13ko saioan bertan zehaztuko dute noiz eta non egingo duten hurrengo saioa.
