Kukairen 'Gauekoak' ikuskizunak bost hautagaitza lortu ditu Max Sarietarako
Honakoa kategorietan izendatu dute Kukai dantza konpainia: Gizon dantzaririk onena, diseinu onena, ikuskizun onena, koreografiarik onena eta musika konposizio onena.
'Gauekoak' lanaren entsegua, estreinatu baino lehen. Azken urteetan Max Saria eta Kukai eskutik helduta doazen bi kontzeptu dira, lan onaren seinale. Atzo jakinarazi zituzten zeintzuk diren 2020ko Max Sarietarako hautagaiak. Errenteria-Oreretako dantza konpainiak bost hautagaitza jaso ditu Gauekoak lanagatik. Hemeretzi kategoriatan banatzen dira Max Sariak.
Ikuskizun onenaren sari potoloarentzako hautagaiak dira Kukaikoak. Horrez gain, Jon Mayak gizonezko dantzari onenaren kategorian izendapena jaso du, oholtzara bueltatu duen ikuskizunarekin.
Obra ontzen aritu den beste errenteriar batek —Arkaitz Minerrek— hautagaitza jaso du musika konposizio onenarengatik, Luis Miguel Cobo eta Xabier Bandinirekin sortutako lanarengatik.
Sharon Fridman, Cesc Gelabert, Israel Galvan eta Jon Maya berak osatutako koreografiak aukerak ditu antifazdun sagarraren estatuatxoa jasotzeko. Bosgarren —baina ez okerren— hautagaitza Fernando Bernuesentzako da, espazioa eszenikoaren diseinuagatik.
Max saridunak nor izango diren ekainaren 29an jakinaraziko dute, Malagako (Andaluzia) Cervantes antzokian. Sari banaketa egingo den 23. aldia izango da. Iaz bi hautagaitza jaso zituzten Erritu lanarengatik, eta batean nagusitu ziren: koreografia onenaren kategorian (Sharon Fridmanek egin zuen).
Azarotik oholtzetan
Gauekoak ikuskizuna abenduaren lehen egunean estreinatu zuten, Hondarribian. Urtarrilean ere taularatu zuten Kukairen etxea den Niessen kulturgunean.
Mayak azaroan Hitzari adierazi zionez, orain arteko obrarik ezberdinena da, hausnarketa pertsonal eta intimo batetik baitator sorkuntza.
