[Bideoak eta galeria] Izugarri handia eta esanahiz betea izan da Oiartzungo mobilizazioa
Ehunka izan dira Oiartzunen Martxoaren 8ko eguerdiko manifestazioan parte hartu dutenak. Aldarri orokorrez gain, herrikoak ere jendarteratu dituzte.
Emakume kirolariak, sokatiran. Egin dute Oiartzunen Martxoaren 8kom manifestazioa. Handia izan da. Eta esanahiz beterikoa. Egunak propio zituen mezu eta ezaugarriez gain, oiartzuar kutsu oso nabarmena eman diote martxari, feminismoak dituen aldarriak jendarteratu, eta hainbat aitortza egiteko. Antzerki, sokatira ekitaldi, edo bertso bidez egin dituzte aitortza horiek.
Batetik, martxan zehar, 1936ko gerran Oiartzunen hil zituzten lau emakume arrasatearrek ekarri dituzte gogora: Maria Areitio Arana, Francisca Oianguren, Florencia Olazagotia Zeziaga eta Paula Mugika Arregi. “Gure herriko historiaren parte zaretelako zuen izenak lau haizetara zabaldu nahi ditugu. Emakumeok, garai guztietan jasan dugu indarkeria; nahiz eta, gure estatuak, kaleak, eraikinak eta liburuak gizon izenak jaso, emakumeok ere herri hau sortu, eraiki eta mantendu dugu, gure izerdiarekin baita gure odolarekin ere”.
Bestetik, herriko emakume kirolariei omen egin diete martxaren zati batean, sokari tiraka. Udane Loidi Labandibar eta Udane Arbelaitz Mateo munduko txapeldun izan dira sokatiran, baina aldi berean, feminismoa kirolaren mundura zabaltzeko bidean lanean ari diren beste emakume batzuei ere gorazarre egin diete: Ane Asensio Telletxea, Eider Maya Sanzberro, Leire Inarguren, edo Alazne Garrido Zapirain.
Belutenen zabaldutako pankartarekin, berriz, zaintza eta eguneroko ardurak nork egiten dituen ohartarazteko, eta salatzeko gunea jarri dute: “Kapitalismo basati, patriarkal eta arrazistari arrakalak sorraraziz aste honetan gure ohituren inguruan hausnartzeko jarri ditugu herritik barrena hainbat esaldi: ‘Zer moduz zaude?’ galdera zenbatetan egin duzu? Nork lagundu du amona medikuarenera? Zenbat labadora jarri dituzu aste honetan? Nor joan da haurren bila? Nork erosiko dio oparia ilobari? Eta abar.. Gaur esaldi horietako bat bistarazi dugu nahi izan dugu Belutenen zabaldutako pankartan, ‘Zenbatetan joan zara erosketak egitera aste honetan?’.
Aldi berean, XVI. mendera jauzi egin dute ere bai, Alaia Martinek kantatutako bertsoekin osatu den gunera. Catalina Belzunze eta Maritxo de Oyarzuni aitortza egin diete, “haien maitasunari helduz, gaur egunera gatoz patriarkatu heteronormatibo eta zigortzailea haustera. Bortxtzailea nor zen? Zu! Bortxatzailea nor da? Zu!”.
