[Galeria eta bideoa] Ehunka pauso irmo berdintasunerantz
Hezkidetza Mahaiak eta Gaxuxak deituta, hamarnaka emakume elkartu dira Lezoko plazan. Zutabea osatu dute, Errenteria-Oreretako manifestazioa elikatzeko.
Zutabea osatu dute Errenteria-Oreretara joateko. 11:30ean jarria zuten zita, Lezoko plazan. Ordu horretarako minutu gutxi falta zirela, pixkanaka-pixkanaka emakume pila eder bat agertzen hasi da, plazan hasten diren hiru kaleetatik.
Gaur Martxoak 8 da, Emakumeen Eguna, eta Hezkidetza Mahaia eta Gaxuxak mobilizazioa deituta zuten. Errenteria-Oreretako manifestaziora oinez joan aurretik, adierazpen bat irakurri dute, gogoraraziz oraindik ere eraldaketa emateko pausoak beharrezkoak direla.
“Erreprodukzio sozial jasangarria politika horien erdigunean jartzeko kapital metaketa alde batera utzi behar da, gehiengo sozialen bizi baldintzak prekarizatzen dituelako, natura merkantilizatu eta esplotatzen duelako, etorkizuneko belaunaldien biziraupena arriskuan jartzeraino”, esan dute.
Makillaje politika hutsak alde batera uzteko eskatu dute, eta diskriminazio eta zapalkuntza forma guztiei aurre egiteko. “Erabateko konpromisoa hartu behar dugu gure udalerrietako pertsonekin, berdintasunaren eta justiziaren alde”.
Lezoko emakume antolatuek honako puntu hauek jarri nahi dituzte mahai gainean, behar bezalako lanketa bat egiteko asmoarekin:
- Adin eta jatorri ezberdinen arteko ezagutza, beharrak eta laguntza ahalbideratuko duen herriko berdintasun mahai bat sortzea.
- Udalerriko emakumeek egindako ekarpena aintzatesteko memoria historikoa lantzea.
- Genero ikuspegi batetik udalerriko beharren azterketa egitea, eta errealitate hori hobetzeko neurriak martxan jartzea.
- Zaintzen beharrei erantzuteko udal espazioak egokitzea, eta pertsonen arteko harremanak zaintzea.
- Gazteei zuzendutako rol berdinzaleen gaineko hezkuntza jarduerak bultzatzea.
- Erasoen aurrean baliabide guztiak eskaintzea.
- Adin eta jatorri ezberdinen arteko ezagutza, beharrak eta laguntza ahalbideratuko duen berdintasun mahai bat sortzea herrian.
