[Galeria] Orio, bitan irabazle San Pedroko XI. Test Estropadan
Orioko bi tripulazioak azkarrenak izan ziren larunbatean badiaren bokalean. Sanpedrotarra AE 7. postuan bukatu zuen, San Juan-Koxtapeko neskak 5. postuan, eta Trintxerpeko talde mistoa, 3. lehen txandan.
2020an indartsu jarraituko duela erakutsi zuen Oriok larunbatean. Irudiak: Josu Z. Larunbatean goi mailako arraun erakustaldia izan zen Pasaiako badiaren bokalean. Sanpedrotarra Arraun Elkarteak antolatutako XI. San Pedroko Test estropada jokatu zen. 2020ko sasoiari begira, Orio indartsu jarraituko duela argi geratu zen, bere bi tripulazioak nagusitu baitziren gizonen eta emakumeen txandetan. Jubenilek eta beteranoek osatutako lehen txandan, Badok 13 izan zen garaile.
Erlojupeko formatuan egin zen; traineruak banan-banan irtengo ziren minutu bateko tartea utziz batzuen eta besteen artean. Ibilbidea ez zen berria izan arraunaren zaleentzat; motoraren San Pedroko ontziralekutik, badiaren irteeraraino. Emakumeen artean Orioko neskek aise irabazi zuten; 12 minutu eta segundo 1 behar izan zuten ibilbidea burutzeko. 16 segundo atzetik, Arraun Lagunak.
Gizonetan estuago aritu zen Orio. 21 minutu eta 8 segundoan egin zituzten lau luzeak horiek Donostiarra 6 segundora utziz. Gazteek eta beteranoek osatutako taldean bestalde, Badok 13 izan zen bizkorrena; 11 minutu eta 58 segundoko denbora marka zarauztarrentzat.
Sanpedrotarra Arraun Elkartean etxekoen aurrean lehiatu zen, eta nahiko fin aritu zen. Libiak 21 minutu eta 43 segundoan bukatu zuen estropada eta 7. postuan amaitu zuten sailkapenean, Ondarroa eta Zarautz atzean utziz, besteak beste. 22 minutu eta 27 segundo behar izan zituen , San Juango lehen tripulazioa eta minutu bat gehiago bigarren traineruak. 14 eta 19. postuan bukatu zuten.
Batelera gazteak 5. onenak izan ziren emakumeen artean, 12 minutu eta 43 segundotan amaituta estropada. Oraindik gogor egin beharko dute lan. Aipamen berezia merezi du ere, Trintxerpeko Illunberen traineru mistoak haien taldeko hirugarren bizkorrenak izan ziren eta¡. 12 minutu eta 12 segundoan egin zituzten bi luzeak eta pasaitarren artean, podium bakarra, haiek lortutakoa izan zen.
HITZAk honako galeria hau osatu du, Josu Z-ren argazkiei esker.
