Elkartasuna babesteko kontzertu solidarioa
Elkartasuna da, zentzurik zabalenean Zaporeak elkartearena, eta elkartasun hori babestera dator Niessen Elkarteak iganderako antolatu duen kontzertu solidarioa.
Errefuxiatuentzat otorduak kozinatzen eta banatzen ari da Zaporeak elkartea 2016az gerotzik. Lan eskerga egiten ari da Zaporeak elkartea azken urte luzeetan migratzaileekin. Ordain ezina den horietako lana, eta pertsona askoren bizitza duintzeko, bizi iraupena bermatzeko ezinbesteko dena, bestalde. 2016ko martxoaz geroztik Greziara heltzen diren errefuxiatuei jaten ematen die elkarteak eta hiru urte pasa horietan 1.000.000 otordu baino gehiago banatu dituzte. Otordu horiek prestatzeko, berriz, 500 boluntario baino gehiagoren laguntza izan du Zaporeak elkarteak. Kios Uhartean eta Atenasen izan ostean, Lesbosen ari dira orain, 1.300 otordu kozinatu eta banatzen. Errefuxiatuek, haiek laguntzen ari diren gobernuz kanpoko erakundeek zein bertan lanean ari diren beste elkarteek eraso gogorrak pairatu dituzte azken asteetan eskuin muturreko taldeen aldetik, tartean zaporeak elkarteko boluntarioek. Hala ere, argi azaldu dute, errefuxiatuek beharra duten bitartean, bertan, haiekin izango direla lanean.
Elkartasuna da, zentzurik zabalenean Zaporeak elkartearena, eta elkartasun hori babestera dator Niessen Elkarteak iganderako antolatu duen kontzertu solidarioa. Madalenaren basilikan izango da 12:30ean hasita eta Donostiako Easo abesbatzako beteranoen taldeak jarriko du ahotsa.
Emanaldirako sarrera doakoa izango da, baina bertaratzen direnek diruz lagundu ahalko dute, edota lekari kilo batekin. Zaporeak elkarteak Lesbosen kozinatzen jarraitu dezan da helburua, eta Niessen elkarteak, elkartasun bide horretan alea jarri nahi du. Antolatzaileek parte hartzera deitu dituzte herritar guztiak; noski bildutako guztia, Zaporeak Elkartearentzat, eta horrenbestez, errefuxiatuentzat izango da.
