Hainbat ekitaldi bertan behera geratuko dira, eta instalazio batzuk itxita
Udalak bertan behera utzitako ekitaldien zerrendari beste hainbat saio gehiago gehitu zaizkio. Instalazio batzuk itxita egongo dira.
Osasun publikoa zaintzeko asmoz, Oiartzungo Udalak hainbat neurri hartu ditu, hala nola eurek antolatutako ekitaldiak bertan behera uztea.
Beste hainbat eragilek ere, prebentzio kontuengatik, ekitaldiak bertan behera utzi dituzte. Oiartzun Kirol Elkarteak, federazioaren irizpideak jarraituz, entrenamenduak bertan behera utzi ditu datorren bi asteetan. Eskola Kirola ere bertan behera geldituko da.
Gainerako ikastetxeak bezalaxe, Oiartzungo hezkuntza zentroak itxita egongo dira. Elizalde, Haurtzaro eta Urmendik itxita edukiko dituzte bere ateak.
Horrez gain, Soinueneak, Musikenek eta Eresbilek antolatutako Herri Musikaren Jardunaldiak atzeratu egingo dituzte, data zehatzik gabe.
Independentzia Eguna, atzeratuta
Ernaik larunbaterako antolatuta zeukan Independentzia Eguna atzeratuko dute, oraindik egun konkreturik jarri gabe, eta baldintzen arabera.
Bazkarirako sarrerak erosita dituztenek, herrietako Ernaiko kideekin jarri beharko dute harremanetan. Bestela, sare sozialen bidez idatz daiteke.
