Udalak bere zerbitzuak egokitu ditu, arreta ematen jarraitzeko
Udalaren arreta eta funtzionamenduaren berri eman nahi die oiartzuarrei. Hainbat arlo etenda daudela jakinarazi dute.
Astebete pasatxo da osasun egoera larritu zenetik, eta Oiartzungo Udalak egoerara moldatu behar izan du, herritarrei arreta emateko.
Udalak horren errepasoa egin du: zeintzuk diren funtzionatzen ari diren zerbitzuak, eta zeintzuk ez. Aurrez aurreko arreta zerbitzua etenda dago, baina telefono zenbaki hauetara dei daiteke (administrazio elektroniko bidez ere arreta ematen dute):
- Harrera orokorra: 943 49 01 42.
- Gizarte zerbitzuak: 943 49 05 52.
- Alkatetza: 943 49 18 62.
- Udaltzaingoa: 943 49 33 11.
Beste hainbat zerbitzu edota eraikin dira bertan behera gelditu direnak:
- Elorsoro kiroldegia, Madalensoro pilotalekua, Karla Lekuona futbol zelaia eta kirol instalazio guztiak.
- Abaraxka ludoteka.
- Manuel Lekuona biblioteka.
- Auzoetako lokalak.
Garraioak
Garraio publikoari dagokionez, Xorrola herri barruko autobusak erdira jaitsi du zerbitzua. Arraguatik ’10etan ateratzen dena bakarrik dabil. Taxibusari dagokionez, larrialdietarako bakarrik izango da, eta 943 49 14 74 telefono zenbakira deitu beharko da.
Prozedurak, hondakinak…
Prozedura administratiboak egiteko epeak eten egin dira. Beraz, diru-laguntza eskaera epeak, alegazioak egiteko epeak… bertan behera geratu dira.
Horrez gain, hondakinen ohiko bilketak bere horretan jarraituko du. Hori bai, Garbigunea itxita egongo da, eta garbigune ibiltaria zein altzariak jasotzeko zerbitzua etenda geratuko dira.
Horrez gain, kutsatuta dauden (edo kutsatuta daudela uste duten) pertsonen hondakinen bilketa berrantolatuko du udalak. Horretarako, Udaltzaingora deitu beharko du (943 49 33 11), eta egoeraren berri eman.
Laguntza beharra
Udalak nabarmendu duenez, oiartzuarren osasuna lehenesten dute, eta Oiartzungo etxeetan daudenen egoerak kezkatzen dituela.
Horregatik, 70 urtetik gora dituzten herritarrei deitzen ari dira, baita Gizarte-Ongizate zerbitzuak erabiltzen dituztenei ere. Norbaitek laguntza behar baldin badu, sail horretara dei dezake (943 49 05 52), baita bizilagunen baten egoerak kezkatuz gero ere.
Boluntario sarea
Oiartzun Aurrea izena erabiliz, 100 boluntario saretu dira. Izena eman nahi duenak, galdetegi hau bete beharko du. Blog bat ere martxan jarri dute, beraien jardueren berri emateko zein aisia betetzeko proposamenekin.
