Lezoko Udalak hainbat aholku eman ditu koronabirusari aurre egiteko
Lezoko Udalak herritarrei aholkuak eta eman dizkie koronabirusaren krisiari aurre egiteko. Hainbat eskaera egiteko baliatu du aukera.
Zubitxo kalea, joan den asteko asteazkenean, hutsa. Lezoko Udalak hainbat lezoarrei zuzendutako gomendio eta eskaera zerrenda osatu, eta publiko egin du. Horren helburua da koronabirusagatik sortutako egoerari aurre egin, eta aldi berean osasuna eta ongizatea bermatzeko ahalegina egin dezaten herritarrek. Aldi berean, elkartasunez aritzeko eskatu die herritarrei udalak, eta “orain arte bezala” neurriak eta arauak errespeta ditzatela, “koronabirusari eta larrialdi egoerari guzien artean, elkarrekin aurre egiteko”.
Jarraian, hitzez hitz, udalaren gomendio eta eskaerak:
-
Etxean geratu: osasun larrialdi egoera honen aurrean, ezinbestekoa da etxean geratzea eta irtenaldiak ahal bezain beste mugatzea. Soilik beharrezkoa den kasuetan irten kalera. erosketak egiteko edota farmaziara joateko, hain zuzen. Zure burua zainduz, gainerakoena ere zaintzen duzu.
-
Nahikoa da erosketak astean behin egitearekin. Hartu soilik beharrezkoa dena.
-
Kalera ateratzean arduratsua izan: ez gelditu kalean hitz egiten, segurtasun neurriak eta distantziak mantendu eta babes neurriak hartu.
-
Txakurra izanez gero, etxe inguruan atera. Ez erabili txakurraren irtenaldia paseotxo bat emateko.
-
Arauak errespetatu: udaltzain zein ertzainek emandako aginduak jarraitu eta ezarritako arauak bete, egoera honetan ere bizikidetza bermatzeko. Aipatu biak herritarrei laguntza eskaintzeko eta arauak betearazteko lanean daude, herriko kaleak zaintzeaz harago, saltokietan edota garraio publikoetan egon daitezkeen jende pilaketak bideratuz.
-
Laguntza eskatu: arazoren bat izanez gero edo laguntza behar izango bazenu, deitu 943 524 650 telefono zenbakira.
-
Boluntario gisa lanak egin nahi baduzu eta zure ingurukoei laguntza eskaini nahi badiezu, deitu 943 524 650 telefono zenbakira.
Era berean, Lezoko Udalak, Eusko Jaurlaritzako aholkuei jarraiki, ondorengo gomendioak helarazi dizkie herritarrei:
-
Eskuak sarritan garbitu: ur eta xaboiarekin maiztasunez garbitu. Horrelakorik eskura ez baduzu, erabili del antiseptikoak.
-
Eztul edo doministiku egitean estali ahoa ukondoarekin edo zapi batekin: bota zapia eta garbitu beste behin eskuak ur eta xaboiarekin edota alkohol oinarria duen eskuetako desinfektatzaile batekin.
-
Mantendu gutxienez metro bateko tartea doministiku edo eztula egiten duten, edo sukarra duten pertsonengandik.
-
Ez ukitu begiak, ahoa edota sudurra.
-
Etxean edo leku publikoetan eskuekin ukitzen diren gainazalen garbiketa areagotu.
