Anbulatorioak bere funtzionamenduko aldaketen berri eman du
Aurrez aurreko kontsultak bertan behera geratu dira. Langileek telefonoz artatzen dituzte pazienteak, eta bakarrik larrialdietan joatea eskatu dute.
Lezoko anbulatorioak, beste osasun zentroek bezala, beren jarduna salbuespenezko egoera berrira egokitu du. Berregituraketa horien berri eman dute.
Horrela, hitzartutako kontsultak bertan behera geratu dira. Anbulatorioko langileak telefono bidez ari dira artatzen. Jakinarazi dutenez, eguneko 70-80 bat paziente jasotzen dituzte. Pazienteari entzun eta gero, balorazio bat egiten dute.
Lezoko anbulatorioa [Argazkia: Google Maps].
Hiru aukeretako bat hautatzen dute: pazienteak etxean gelditu behar duela esan; pazientea osasun zentrora joan behar dela esan; edo osasun langilea bera joaten da pazientearen etxera. Etxean geratu behar izanez gero, pazienteak 48/72 ordutan jasoko du deia, eboluzioa zein den jakinarazi dezan.
Aurrez aurreko arreta beharrezkoa denean bakarrik emango dela adierazi dute. Gainera, eskatu dute anbulatoriora hurbiltzekotan, bakarrik larrialdi egoeraren batean izan dadila.
Etxean geratzeko deia
Neurri horien berri emateaz gain, osasungintzako arduradunek dei egiten diete herritarrei etxean gera daitezen. “Norberaren burua zainduz, guziona zaintzen dugu”, gogorarazi dute.
Era berean, telefono deiak larrialdi egoeretan bakarrik egiteko eskatu dute, telefono lineak ez kolapsatzeko. 943 34 44 00 da telefono zenbakia.
