Planoak marrazteko gonbita, paretetatik ihes egiteko
Oiartzun Aurrea dinamikaren barruan, laugarren erronka bota dute. Onintza Etxebestek gonbitea luzatu die oiartzuarrei, plano bat marraz dezaten.
Planoak marraztu beharko dira laugarren erronkan.
Spoiler batekin hasiko da albiste hau: Prison Break telesaileko protagonistetako batek tatuajea zeraman bizkarrean. Bere larruazalean espetxetik ateratzeko kode batzuk zituen tindatuak Michael Scofieldek, besteak beste.
Eta honaino spoilerra. Telesail horretan egiten zen antzeko zerbait proposatu du Onintza Etxebestek. Etxealditik nolabait bidaiatzeko, planoak egitea proposatu du Oiartzun Aurrearen erronka dinamikan. Zehaztu duenez, bakoitzaren etxeko planoa izan daiteke, edo eraikin zahar batekoa, edo Oiartzunen egiten zituen ibilbideena. Edo dena delakoarena. Kontua da burua beste toki batera eramatea.
Ohi bezala, sare sozialetatik partekatzea eskatu dute. Horretarako #oiartzunaurrea traola jada ezagunaz gain, #planotxalentx erabiltzea eskatu dute.
Laugarren Erronka Artistikoa martxan! Ikusi Onintza Etxebestek proposatutako erronka eta parte hartu! Igo zuen planoa (etxekoa, herriko zati batekoa, eskuz, ordenagailuz, txuri-beltzez, kolore biziz…) #oiartzunaurrea eta #planotxalentx traolak erabiliz! Animatu eta parte hartu! pic.twitter.com/2poBVu9GbM
— oiartzunaurrea (@oiartzunaurrea) March 26, 2020
