Errenta aitorpena, aurten ere bai, euskaraz egitera animatu dute
Gaur hasi da kanpaina, autolikidazio proposamena ikusteko aukerarekin. Eskatu dute ogasunari euskaraz harremana egiteko eskatzea, hartara beti hizkuntza horretan aritzeko.
Ez dago pandemiarik ekidingo duenik: gaur hasi da iazko errentaren gaineko kanpaina. Autolikidazio proposamenak Internet bidez ikus daitezke, edota etxera iristen hasiko dira pixkanaka. Apirilaren 6tik aurrera, berriz, izango da etxera iritsiko proposamen hori onartzeko (ala ez) epearen lehenengo eguna.
Etxera iristen ez bada, norberak egin dezake Internet bidez, apirilaren 15etik aurrera. Errenta mekanizatua deitzen den horretarako (aurrez aurre bulegoan egitea) ez dago datarik.
Errenta aitorpena, euskaraz
Beste urte batez, errenta aitorpena euskaraz egitera animatu du Oiartzungo Udalak. Hiru modutan ezar daiteke euskarazko harremana. Lehenengoa, telefono zein Internet bidez onartzerakoan, euskaraz egin nahi dela esan behar da. Aurrerantzean, Gipuzkoako Foru Ogasuna euskaraz zuzenduko zaio zergapekoari.
Internet bidezkoa da bigarren bidea. Errenta programaren euskarazko bertsioa jaistera gonbidatu dute, eta behin jaitsita, hizkuntzen atalean euskara hobestea. Aholkularitza zerbitzu batekin egiterakoan, euskaraz egin daitekeela adieraz daiteke, baita finantza erakunde batekin edo antzeko erakunde batekin egiten baldin bada ere.
Oraindik data zehatzik ez duen errenta mekanizatua egiterakoan, animatu dute hitzordua hartzerakoan euskarazko arreta jasotzea eskatzeko. Horrela, Ogasunarekin harremana euskaraz izango da. Gainera, sinatzeko ematen duen orria ere euskaraz jaso daiteke.
Iaz, %37
Urtetik urtera, gehitzen ari da errenta aitorpena euskaraz egiten duten oiartzuarren kopurua. Iazko kanpainan %37, 10 izan ziren, aurreko kanpainan baino pixka bat gehiago. 2018ko kanpainan %36,38 izan ziren.
Oiartzungo Udala 2005ean hasi zen errenta aitorpena euskaraz egitera animatzen. Urte hartan %6 besterik ez ziren izan euskaraz egin zirenak.
