Konfinamendua ez dadin amesgaizto izan
Konfinamendua zaila da askorentzat, etxetik ezin ateratzeak erabat mugatu dielako bizimodua, beste kasu batzuetan zaila izatearekin batera amesgaizto ere bilaka daiteke. Indarkeria matxista sufritzen duten emakumeen kasua da.
Egun osoan etxe barruan egotea ezinbestekoa egin du konfinamenduak. Osasun larrialdiaren barruan, eta alarma egoera izendatu ostean heldu zen neurri hori. Konfinamendua zaila da askorentzat, etxetik ezin ateratzeak erabat mugatu dielako bizimodua, beste kasu batzuetan zaila izatearekin batera amesgaizto ere bilaka daiteke. Indarkeria matxista sufritzen duten emakumeen kasua da. Egoerak berak, 24 orduak etxean eman beharrak, larriagotu egiten du egoera horretan bizi diren emakumeen egunerokoa. Telefonoz salaketa egitea, are zailagoa da egungo egoeran gainera. Horren aurrean, indarkeria matxista jasotzen duten emakumeei deitu eta salatzeko eskatu die Itziar Ostolaza zinegotziak.
Ez soilik beraiei, egungo egoeran bizilagunen arteko harremana estutzen ari da, elkartasun sareak sortzen eta herritarrei oro har adi egoteko eskatu die, “halako egoeraren bat entzuten badugu denoi dagokigu telefonoz deitu eta salatzea”. Mezua garbia, konfinamenduan ere, eta batez ere adi egotera eta indarkeria matxistari zero tolerantzia erakustera.
Udala jarraipen zuzena egiten ari dela identifikatutako kasuetan jakinarazi du Ostolazak, “arazoa identifikatu gabeko kasuekin dugu, indarkeria matxista sufritzen ari direla ez dakigunekin”.
Bide batez, gogora ekarri du, Emakumeen Etxeak eskaintzen duen Orientabide Juridikoa eta Norberaren Jabekuntzaren Gunea zerbitzuak presentzialki ez bada ere, telefono bidez eskaintzen jarraitzen dutela profesionalek. Orientabide juridikoa asteartetan 18:00etatik 20:00etara eskaintzen dute, eta jabekuntza gunearen ostegunetan 16:00etatik 18:00etara; bietarako aldez aurretik hitzordua hartu behar dute interesdunek 010 arreta telefonora deituta, edota posta elektroniko bidez.
Erasoa jaso edo antzematen bada, honako telefono zenbakietara deitu:
- Larrialdietako telefonoa: Sos Deiak, 112 (24 ordu).
- Udaltzaingoa: 092 (24 ordu).
- Ertzaintza: 943 538 880 (24 ordu).
Informazioa eta orientazioa:
- Eusko Jaurlaritza (SATEVI): 900 840 111 (24 ordu).
- Errenteriako Udala: 010 (09:00etatik 17:00etara).
