Herriko kultura sortzaileek proposamenak kozinatzen jarraituko dute
Kultur labea egitasmoaren barruan, herriko hiru sortzailek beste hainbeste lan eskainiko dituzte gaurtik hasi eta ostiralera bitartean.
Carmen Ceperoren 'Aliento' pieza gaur ikus ahal izango da. Kultur labea egitasmoak produktuak prestatzen jarraituko du datozen egun hauetan. Gaurtik ostiralera bitartean sortzaileen hiru proposamen ikusteko aukera egongo da.
Gaur, hilak 15, Carmen Cepero dantzari eta koreografoak Aliento pieza eskainiko du. Konfinamendu egoerak hauspotutako lana sortu du Ceperok. 18:00etan hasiko da emanaldia, eta Kultur labearen web orrialdean ikus daiteke.
Bihar, osteguna, Joxe Mari Carrerek ipuin kontalariak Mikelazulo. Istorio berdaderoa kontatuko du. Ostiralean Alazne Etxeberria aktoreak umoreari tarte emango dio, euskarazko bakarrizketa batekin.
Kultur eskaintza, aurrera
Kultur labea iniziatiba martxan jarri zuen, pasa den astean, Errenteriako Udalak. Helburua herriko kultur sorkuntzak jarraitzea da, etenik gabe, Covid-19ak sortu duen egoerak irauten duen bitartean.
Osasun larrialdiak irauten duen bitartean, Errenteriako Udalak artistak kontratatu ditu, beren lana ezagutaraz dezaten, eta bide batez, herritarrentzako aisia eskaintza aberasteko.
