Karrikako Galtzaraberri presa eraisteko baimena eman dute
Presa botatzeko baimena eman du udalak, bi arrazoirengatik: aspaldi ez dela erabili, eta inguruko habitat naturala berera bueltatzeko, pixkanaka.
Galtzaraberriko presa botako dute, ingurua lehengoratzeko. Karrikako presetako bat botatzeko baimena eman du Oiartzungo Udalak, Galtzaraberrikoa hain zuzen ere. Errekaren habitat naturala, kontserbatzea, lehengoratzea eta uraren ekosistema hobetzea dira helburuak. Presa hori kenduta, arrainen migrazioa hobetuko da.
Udalak baimenak eman dizkio aldundiaren Lan Hidraulikoen Zuzendaritzari. Egoerak hala behartuta, baina, lanek ez dute hasiera data zehatzik. Aurrekontua bai, ordea: 171.189,29 euro, eta Europako FEDER planaren laguntza dute.
Bigarren fasea
Presa eraisteko lanen bigarren faserako baimenak eman ditu udalak. Izan ere, lehen fase batean eraisketa partziala egin zuten. Lan horien aurretik, Galtzaberriko presa osoak 32,5 metroko luzera eta lau metroko altuera zuen.
Erreka lehengoratzeko lanen barruan, Urzelaietako zentral elektrikoa ere eraitsi zuten, lehengoratzeko proiektuaren baitan.
Bigarren fasean, berriz, honako lan hauek egingo dituzte, Oiartzungo Udalaren arabera: geratzen den presa zatia eraitsi, sarbidea konpondu, errekaren ibilgura sarbidea egin, ibilgua hondeatu, zubi zimendua lurreztatu, drainatze lanak eta ezponda babesteko harri-lubetak jarriko dira.
Galtzaraberriko zubia bere horretan utziko dutela iragarri dute. Aiako Harria Natura Parkearen barruan dago eremua.
