Orereta-Errenteriako Sagardo Eguna, bertan behera
Errenteria-Oreretako Sagardo Eguna, bertan behera utzi dute. Hilaren 25ean zen egitekoa. Antolatzaileek lanean jarraitzen dutela adierazi dute.
Oreretako XXVI. Sagardo Egunean 36 sagardogileren sagardoa dastatzeko aukera izango da. Gehienak gipuzkoarrak izan arren, Bizkaia, Nafarroak eta Lapurdikoak ere izango dira. Espero zen, baina antolatzaileen baieztapen ofiziala iritsi da: apirilaren 25ean egitekoa zen Orereta-Errenteriako Sagardo Eguna bertan behera utzi dute. “Etxean geratzeko beharra dugu Covid-19aren krisiagatik, ezinbestean”. Dena dela, antolatzaileek jakinarazi dute lanean jarraitzen dutela: “Bizitzen ari garen honek guztiak buelta ematen duenean, ekingo diogu berriro ere herri honek merezi duen egun paregabeari”. Herriko udaberriko jai eta gizarte bizitzaren zati garrantzitsua da Sagardo Eguna. XXXII. ekitaldia beteko luke aurten.
Antolatzaileen esanetan aurtengo ediziorako berritasun asko zituzten prest, eta horien artetik zehaztu dute inoiz baino sagardogile gehiagok zutela parte hartzeko asmoa, “aukera paregabea eskaini nahi genion herriari sagarraren zuku paregabea dastatzeko, baita egun alaitsu, dinamiko, euskaldun, parte hartzaile, bizi, parekide eta prestua bizitzeko ere”.
Antolakuntza taldeak, adi berean, eskerrak eman dizkie jai handia era batera edo bestera antolatzen laguntzen ari direnei, talde, eragile eta norbanakoei, “mila esker, berriro ere, zuri, herri honetako egunik bikainenetakoa antolatzen aritzeagatik. Zure esfortzuari esker mantentzen duzu/dugu herri hau bizirik”.
