Mendibururen eskultura, Wally baino galduago
'Non dago Mendiburu?' escape rooma osatu dute Biyurrienea gazte taldeak eta Oiartzun Aurrea iniziatiban, elkarrekin. Nerabe eta helduentzako da.
Mendibururen eskulturaren desagerpena da jokoaren abiapuntua. Biyurrienea gazte taldeak eta Oiartzun Aurreak escape room bat prestatu dute. Hura ere Internet bidez zabalduko dute, konfinamendu garaietan sortutako jarduera gehienak bezalaxe. Non dago Mendiburu? izena jarri diote.
Izan ere, Sebastian Mendibururen eskultura da jokoaren abiapuntua: eskultura hori desagertu egin da, buzoian jasotako Udala Informatzen-ek jakinarazten duenez, eta aurkitu egin behar dute. Jokoak aisiaren zati handi bat bete dezake: 90-120 minutu arteko iraupena dauka.
Nerabe edota helduentzako dago pentsatuta, eta ezinbestekoa da Interneterako sarbidea duen ordenagailua izatea. Gainera, .zip moduko artxiboak deskonprimitzeko programa bat izan behar da instalatuta (ordenagailu gehienek izaten dute normalean). Jokoaren oinarri guztiak zein jokoa bera hasteko modua esteka honetan aurki daiteke.
