Merkataritza, ostalaritza eta zerbitzuen arloko langileei zuzendutako online topaketak egingo dira
Apirila amaitu baino lehen hainbat online ekintza antolatuko ditu Oarsoaldea Eskualdeko Garapen Agentziak, Errenkoalde, Laurak Bat eta Itturri merkataritza elkarteekin elkarlanean.
Ikastaro guztiak guztiz doakoak izango dira. Garai zailak datoz Oarsoaldeko langileentzat. Baina garai berrietara egokitzeko aukera ere izan daiteke. Hala uste dute Oarsoaldea Eskualdeko Garapen Agentzian eta erronkari aurre egiteko, merkataritza, ostalaritza eta zerbitzuen arloko langileei zuzenduriko hainbat online ikastaro antolatuko dituzte, Errenkoalde, Laurak Bat eta Itturri elkarteekin batera. Helburua, langileak kontsumo ohitura berriak ezagutzea eta eskualdeko hiri-ekonomia bultzatzea da.
Eskualdeko merkataritza elkarteen #NIKOARSOALDEAN kanpainan oinarrituta doako bi online topaketa ala webinar antolatuko dituzte apirila amaitu baino lehen. COVID-19ak dakarren krisi ekonomikoaren aurrean, tokiko ekonomia suspertzeko bideak aztertuko dira topaketetan.
Lehen online topaketa hilaren 21ean (asteartea) egingo da 11:00etatik 12:00etara. Instituzioak, merkataritza, ostalaritza eta zerbitzuentzat sustatzen ari diren neurri ekonomikoei buruzko gogoeta eta kontrastea izenburupean, asteotan iragarri diren diru-laguntza guztiak aztertuko dituzte. Prozesua azaldu eta erraztuko dira, taldearen laguntzarekin. Webgune honetan eman daiteke izena.
Bigarrena hilaren 23an izango da, 11:00etatik 12:00etara. Sezzen enpresako Mokika Tubiak aholkulariak gidatuko du, Coaching-a eta ekintzak Oarsoaldeko Merkatari, Ostalari eta Zerbitzuentzat. Egoera berrietara egokitzeko eta ekintzailetzaren gakoak hausnartuko dituzte, modu positiboan. Webgune honetan eman daiteke izena. Datozen asteetan tankera bereko topaketak egingo dituzte.
