Drogen frogan positibo eman duen gidari bat atxilotu dute
Gidari bat atxilotu dute, drogen frogan anfetaminagatik positibo emateagatik. Horrez gain, bost bat gramo speed eta haxixa ere bazituen.
Eusko Jaurlaritzaren Segurtasun sailak jakinarazi duenez, 38 urteko gidari bat atxilotu zuten bart gauerdian. Patruila batek GI-2134 errepidean abiadura handian zihoan ibilgailu bat ikusi zuten. Autoa geldiarazi, eta ertzainek ikusi zuten ibilgailua ez zela azkar zihoan bakarra.
Gidariari drogen froga egin eta anfetaminetan positibo eman zuen. Horrez gain, gidariaren eserlekuaren azpian hauts zuriz betetako poltsa bat aurkitu zuten, eta gizonak (kotxean bakarrik zihoan) esan zien anfetamina zela. Ertzaintzaren arabera, bost bat gramoko pisua zuen poltsa horrek.
Gainera, poltsiko batean haxixa atzeman zioten. Gizonak azaldu zuenez, sustantzia horiek erostetik zetorren. Hauts zuria eta haxixa konfiskatu ondoren, gizona atxilotu zutela jakinarazi du Segurtasun Sailak. Alde batetik, osasun publikoaren kontrako delitu batengatik. Bestetik, larrialde egoera ez betetzeagatik.
Errenteria-Oreretako ertzainetxera diligentziak eraman ondoren, aske utzi zuten. Epailearen aurretik pasatu beharko du, hala ere.
