Arraguako festak bertan behera utzi dituzte
Auzoko festen artean lehenengoak dira Arraguakoak. Jai Batzordeak erabaki du 2020an ez direla egingo, guztien hobe beharrez.
Arraguakoak izan ohi dira auzoetako festetan lehenak, baina 2020 honetan ez da hala izango. Arraguako Jai Batzordeak jakinarazi duenez, denen hobe beharrez hartu dute erabakia.
“Erabaki onena dela pentsatzen dugu. Zaila da antolakuntzan hainbeste lan egin eta gero, honelako irtenbidea hartu behar izatea, baina egoera honek ez digu beste aukerarik uzten”, adierazi dute.
Eskerrak eman dizkiete auzoko festak aurrera eramaten laguntzen duten orori. Aurten indarrak gordetzea tokatuko dela esan dute, eta indar handiagoarekin bueltatuko direla. Zaintzeko eta pozik bizitzeko eskatu dute Arraguako Jai Batzordekoek.
Maiatzaren erdialdean ospatu ohi dira Arraguako festak. Azken urteetan, gainera, bi asteburutan banatzen dituzte festen egitarauko ekitaldiak.
