Ohitura osasuntsuak sustatzeko sortu da '5 hatz 5 erronka'
Konfinatuta dauden honetan, haur eta gazteek bizimodu osasungarriagoa izan dezaten sortu da egitasmoa, Eskubidean planaren baitan. Guztira bost erronka izango dira.
Gaur bertan zabaldu dute '5 hatz 5 erronka' egitasmoaren lehen erronka. Pasaiako Eskubidean plana osatzen duten eragile ezberdinek lanean ari dira, konfinamenduak haurrengan izan ditzakeen ondorioei buelta emateko. Itxialdiak gogor jo du populazioa, baina bereziki haur, nerabe eta gazteak, haien garapen eta hezkuntza aukerak nabarmen murrizten baitira. Hezkuntza prozesua etxetik jarraitzeko aukera izan dezaten, martxan da 5 hatz 5 erronka.
Erronkek, gazte eta nerabeen artean ohitura osasuntsuak bultzatzea izango dute helburu; elikadura egokia, kirola egitearen garrantzia, ala teknologia berriak arduraz erabiltzea. Erronka eta ekintzek gazteen testuingurura egokitutakok izango dira, sormenean oinarrituta eta etxean egiteko modukoak izango dira.
Eskubidean planak Pasaiako haur, gazte eta nerabeen eskubideak erdigunean jarri nahi ditu, eta itxialdian ere, hala izango da. Erronka guztietan haurren eta nerabeen eskubideen inguruko aipamen bat egingo da. Asmoa da, eskubide horiek errespetatzeaz gain, konfinamenduan ere gauzatu ahal izatea.
Lehen erronka, elikadura
Erronka bakoitzeko zereginak, jarraibideak eta aholkuak, irudi batean azalduko dira. Atzo zabaldu zuten lehen erronka, osasuntsu elikatzearena hain zuzen ere. Egindako erronken argazkiak posta elektronikoz bidali beharko dira, agertzen direnen izen abizenekin. Irudiekin bideo bat egingo dute eta opariak ere izango direla iragarri dute.
Gainontzeko erronkak Pasaiako Udalaren Facebook eta Twitter kontuetan zabalduko dira, baita Eskubideanen Instagram kontuan. Pasaiako Ikastetxeek era berean gurasoei helaraziko dizkiete erronkak, posta elektronikoz.
