Alarma egoeran ere, konposta guneetako jarraipen bisitek aurrera jarraitzen dute
Hurrengo bisita hilaren 30ean izango da. Alarma egoerak ezarritako neurriei jarraiki, publikorik gabe egingo dira bisitak, segurtasuna zaintze aldera.
Guillermo Lazon auzoko konposta gunea. Argazkia: Lezon Ondo Ai Ginen. Martxoan hasi ziren Lezoko konposta guneetara egiten diren jarraipen bisitak. Koronabirusaren ondorioz ezarritako alarma egoerak indarrean jarraitzen du, baina datorren astetik aurrera, bisitak egiten jarraituko dutela jakinarazi du Lezoko Udalak. Hurrengo bisita hilaren 30ean izango da, 9:00etatik aurrera eta ohiko ibilbidea jarraituko du; Altamira, Andreon, Aralar, Arretxene eta Lopeneko konposta guneak bisitatuko dituzte hurrenez hurren.
Bisitak ordea, publikorik gabe egin beharko dira segurtasuna zaintze aldera. COVID-19aren ondorioz ezarritako alarma egoera indarrean jarraitzen du, hortaz, segurtasun neurri bereziekin egin beharko dira bisitak. Hori dela eta, guneetara ez joateko eskatu die udalak erabiltzaileei.
Hondakinen kudeaketari dagokionez, Lezoko Udaletik gogorarazi dute hondakinak konposta guneen bitarteez kudeatzen jarrai daitekeela arazorik gabe. Egunerokoan hartutako neurriak konposta guneetan ere errespetatu beharko dira; segurtasun tartea mantendu beharko da, bi erabiltzaile baino gehiago ezingo dira sartu une berean eta maskarak eta eskularruak erabiltzea gomendagarria da.
Lezoko Udalak adierazi du, oraingoz ez dagoela SARS CoV 2 koronabirusa konpostaren bitartez kutsatu daitekeela dioen adierazlerik. Konposta guneak ondo zainduz gero, tenperatura altuak lortuko dira eta horrekin batera birus eta bakteriak hiltzea.
Aralar guneko berregituraketa bestalde, behin behinean etetea erabaki du udalak. Gauzak horrela, hilaren 30etik aurrera, jarraipen bisitak ohi bezala egingo dira. Zalantzak argitzeko, erabiltzaileek udalarekin edota aholkularitza teknikoarekin harremanetan jarri ahalko dira, posta elektronikoz, edota Whatsapp bidez, 647 057 402 zenbakira idatziz.
