Haurrekin kalera ateratzeko hainbat gomendio eman ditu udalak
Atzotik haurrak ordubetez atera daitezke kalera. Pasaiako Udalak barruti bakoitzera egokitutako hainbat gomendio luzatu dizkie gurasoei.
Hauek dira Pasaiako Udalak emandako gomendioak, haurrekin kalera ateratzeko. Irudia: Pasaiako Udala. Atzotik etxeko txikienek gutxieneko askatasun kutsu bat berreskuratu dute haien bizitzetan. Alarma egoeran egindako aldaketei jarraiki, haurrak kalera irten ahalko dira, hiru baldintza argi beteta; etxeko pertsona bakar batekin ateratzea, ordu batez eta gehienez, etxetik kilometro batera. Irteerak egiteko ordutegi baimendua 9:00 21:00etarakoa izango da.
Hiru arau horiekin batera, Pasaiako Udalak hainbat gomendio egin ditu irteera txiki horietan haurrak eroso sentitu daitezen eta segurtasun neurriak bermatzeko. Tokiak aukeratzerakoan, eremu irekiak eta espazio zabalak lehenestea eskatu dute, ilarak eta espaloi estuak alde batera utziz.
40 egun baino gehiago konfinatuta eman ondoren, haurrak ez beldurtzearen garrantzia nabarmendu du udalak. Haurrek zerbait ukitzen badute, haiek ez iraintzea ere eskatu du udalak. Horrelakoen ondorioak konpontze aldera, gel desinfektatzailea edota ura eta xaboia eraman beharko dira.
Pasaiako barruti bakoitzean errealitatea ezberdina denez, irteerak egiteko barruti bakoitzari egokitutako gomendioak eman ditu udalak. Trintxerpen Euskadi etorbidean ibiltzea iradoki dute eta Antxon Ibaiondo pasealekuan. Sanpedrotarrei eta donibanetarrei puntetako ibilbidea egitea eskatu zaie, bakoitzak bere herriko partetik noski.
