Bidez Bide zerbitzua bueltatu da, etenda egon ondoren
Landa eremuan bizi diren edadetuak erosketak eta botiken bila hurbiltzen dituen zerbitzua itzuli da. Udaletxera deitu behar da.
Oiartzungo Udalak eta Behemendik elkarlanean indarrean jarri zuten Bidez Bide zerbitzua berriro martxan da. COVID-19k sortutako osasun larrialdi egoera zela eta, martxoaren 13tik ez zuten zerbitzu hori ematen.
Bidez Bide zerbitzua landa eremuan bizi diren pertsonei zuzenduta dago. Zehazki, pertsona edadetuak edo mugikortasun arazoak dituztenak dira programa horren erabiltzaileak.
Pasa den astean hasi ziren zerbitzua berriro ematen. Zerbitzu behar duen erabiltzaile berririk balego, Oiartzungo Udaleko Gizarte-Ongizate Sailarekin jarri beharko da harremanetan. Horretarako, 943 49 05 52 telefono zenbakira deitu beharko da. Bizitokitik herrigunera joan behar dutenentzako da zerbitzu hori, erosketak egin ditzaten, edo botiken bila joateko.
Arratsaldeetan, berriz, Bidelagun zerbitzua eskaintzen zuten, pertsona horiek aisia jardueretara bideratzeko. Oraingoz etenda jarraitzen du zerbitzuak.
