Euskal Herria plazako parkinaren erabilera baldintzak lehengoratuko dira
Datorren astelehenetik aurrera, txandakatutako aparkatzea sartuko da berriro indarrean. Egunean zehar, ordu eta erdiz aparkatu ahal izango da.
Euskal Herria plazako aparkalekuaren sarrera eta irteera.
Datorren astelehenetik aurrera, Euskal Herria plazako aparkaleku publikoaren erabilera baldintzak osasun larrialdiaren aurreko egoerara bueltatuko dira. Alegia, txandaka aparkatu ahal izango da.
Astelehenetik ostiralera, 08:00etatik 20:00etara, ordu eta erdiko doako aparkalekua egongo da baimenduta bertan. Larunbatetan, berriz, denbora-muga bereko txandakatze sistema izango da 08:00etatik 14:00ak arte.
Konfinamendu egoera guztiz pasatu ez baldin bada ere, Oiartzungo Udalak azaldu du Elizaldeko komertzio txikiek pixkanaka irekiko dituztela beren ateak. “Normalizazioa hasiko delako datozen egunetan eta herritarrei horietara iristeko erraztasuna emateko asmoz”, adierazi du udal erakundeak.
COVID-19k eragindako larrialdi egoera dela eta, txandakatze sistema bertan behera utzi zuen udalak. Larrialdi egoera fase berrietan sartzen hasi da, eta momentura egokitzeko erabakiak hartzen jarraituko du Udalak.
