Girizia elkartea "herriarena" dela aldarrikatuko dute
Espainiako Auzitegi Nazionala 'herriko tabernen' epaia exekutatzen hasi da. Igandera arte animo mezuak jasoko dituzte.
Girizia libre nahi zutela aldarrikatu zuten 2015ean. Espainiako Auzitegi Nazionala duela egun batzuk hasi zen herriko tabernen kontrako epaia exekutatzen. Epai haren arabera, Euskal Herriko 103 lokal konfiskatu behar dituzte, eta hainbat diru kontutatik dirua ateratzen hasi dira.
Alarma egoera indarrean egon arren, Giriziako kide edota haren bueltan ibili direnak ez dira besoak gurutzaturik geratuko. Modu seguru eta indibidualean parte hartzeko mobilizaziora deitu dute.
Gaurtik (astelehena) igandera bitartean, paseorako edo kirolerako orduan, Girizia elkartetik pasatzeko deia luzatu dute. Bertan papertxo bat edo post-it bat itsasteko eskatu dute, animo mezuekin edota Girizia elkarteak norberarentzat suposatzen duenarekin.
Elkartearen lan esparruekin (mendi taldea, elkarte gastronomikoa, zikloturismoa, bertsolaritza…) harremana izan duten oiartzuar guztiak gonbidatu dituzte mezuak uztera. Baita ere inolako harremanik izan ez eta egoera bidezkoa ez dela iruditzen zaien herritar guztiak.
