Herriko merkataritza suspertzeko bonoak aterako dituzte
Datorren asteartetik aurrera, merkatariek izena eman dezakete bonoen udalaren kanpainan parte hartzeko. Diru laguntza lerro bat ere zabalduko dute.
Komertzio txikiaren alde egindako ekitaldi bateko argazkia. Datorren astelehenean irekiko dira COVID-19aren ondorioz itxita egon diren establezimenduak. Bi hilabete hauetan izan dituzten galerak arintzeko asmoz, Oiartzungo Udalak bonoen kanpaina bat abiaraziko du. 25.000 euro bideratuko ditu horretara, momentuz.
Udalak azaldu duenez, bonoen kanpainan, herritarrek 30 euroko bonoak erosteko aukera izango dute izena ematen duten establezimenduetan. Ondoren, denda edo taberna horietan bertan 40 euro gastatzeko aukera izango du gero. Udalak jarriko du hamar euroko alde hori.
Datak
Bono kanpainan parte hartu nahi duten merkatari eta ostalariek izena eman beharko dute, hilaren 12ra arte (datorren asteartea). Udalaren webgunean galdetegia eta eskaera orria bete beharko dituzte. Esteka honetan klik eginda sar daiteke atal horretara.
Hilaren 18tik aurrera eros daitezke bono horiek, parte hartzea erabakitzen duten establezimenduetan. Udalak datorren astean jakinaraziko ditu zeintzuk diren.
Diru laguntzen lerroa
Merkatari eta ostalarientzako zuzeneko diru-laguntza lerroa ere sortuko du Oiartzungo Udalak. “Egoera errealari ahalik eta ondoen erantzun ahal izateko, merkatari eta ostalarien egoera zein den jakiteko galdetegia prestatu du udalak”, adierazi dutenez. Emaitza horiekin, lerroa diseinatuko dute.
Galdetegia bera ere hilaren 12ra arte erantzun beharko da.
