Komertzioei osasun larrialdiari buruzko euskarazko errotuluak eskaini dizkiete
Oiartzungo Udalak eta Ttur-tturrek eskaini dituzte kartel horiek. Prebentzio neurriak eman dituzte bertan. Euskarak atzerakada izan duela iritzi dute.
Euskara merkataritzara egitasmoaren barruan, Oiartzungo Udalak eta Ttur-ttur Euskaltzaleon Bilguneak euskarazko errotulu eta kartelak jarri dituzte herriko establezimenduen eskuetan. Zehazki, larrialdiaren fase honetan irekitzeko, segurtasun argibideak ematen dituzten mezuak jasotzen dituzte. Bai Euskarari elkarteak sortu ditu.
Errotuluak norberak inprima ditzake, Bai Euskarari-ren webgunetik. Horretarako aukerarik ez dutenak Ttur-tturrekin jarri daitezke harremanetan, bai telefono bidez (943 26 01 82) edo posta elektroniko bidez idatzita.
Euskarak, atzerakada
Oiartzungo Udalaren ustez, COVID-19k sortutako larrialdi egoerak euskararen erabileran atzerakada sortu du. Horregatik, udal erakundeak eta Ttur-tturrek merkataritzan euskara sustatzeko egitasmoa martxan jarri dute, Euskara merkataritzara lelopean.
“Osasun-normaltasuna berreskuratzearekin batera”, adierazi dute, “euskararen erabileran ere normalizaziorako urratsak ematen jarraitu nahi dugu, gure herritik bertatik hasita”.
