Altzaten ur jolas parkea egiten hasi dira
Altzaten ur jolas parkea egiten hasi dira. Udalak espero du udarako bukatuta izatea, baina erabiltzeko ikusi beharko da zein den koronabirusaren bilakaera.
Lezoko Altzate igerilekuan ur jolas parkea egiteko lanak hasi dira. Udalak jakinarazi du hilaren hasieran abiatu zituztela lan horiek. 100 metro koadroko azalera izango du, hiru gunetan zatitua. Dutxak dauden eremuan egiten ari dira.
- Guneetako bat 0-4 adin tartekoentzat izango da. Altuera txikiko gailuak egongo dira, eta haurren zentzumenen garapenean eta urarekiko interakzioan oinarrituta izango dira.
- Familia eta haurrentzako gunea ere egongo da, jolas aktiboagoekin, haurrek gurasoekin gustura izateko.
- Bestalde, gaztetxoek ere tokia izango dute Altzateko ur jolas parkean, jolas handiago eta altuagoekin.
Udalaren asmoa da udarako bukatuta izatea lan horiek, parkea erabilgarri egotea alegia. Baina ohartarazi du horren erabilera koronabirusaren krisiaren egoeraren araberakoa izango dela, Osasun Sailak adierazitako neurri zein baldintzei lotuta egongo dela. “Gure asmo eta nahia da lezoarrek aurtengo udan erabili ahal izatea jolas parke berria, baina betiere egoeraren bilakaerari erreparatu beharko diogu”, esan dute udaletik.
