[Bideoa] Lehen faserako gomendioak eman ditu Oiartzungo Udalak
Konfinamendua arintzea helburu duen fasean zein prebentzio neurri hartu behar diren gogorarazi ditu udalak. Establezimenduentzako gomendioak ere aipatu dituzte.
Oiartzun atzotik konfinamendua arintzeko 1 Fasean dago, eta zenbait arau aldatu dira. Hala ere, oraindik dena ez da festa, eta horregatik, Oiartzungo Udalak bideo bat prestatu du, prebentzio neurriak gogorarazteko.
“COVID-19 berriro pandemia bihurtu ez dadin, garrantzitsua da higiene eta segurtasun prebentzio neurriak mantentzen jarraitzea”, ohartarazi du udalak. Horrela, eskuak maiz garbitu eta etxetik ateratzean pertsonen artean bi metro mantentzea ezinbestekoa da.
Kalera ateratzeko ordutegiak mantendu egingo dira fase honetan: 14 urtez gora dituztenek jarduera fisikoa egiteko aukera izango dute 06:00etatik 10:00etara eta 20:00etatik 23:00etara; 70 urte edo gehiago dituztenek 10:00etatik 12:00etara atera daitezke eta 19:00etatik 20:00etara, eta haurrak 12:00etatik 19:00etara.
Establezimenduak, irekita
Fase berrian, orain arte itxita egon diren taberna eta dendek ireki daitezke. Establezimendu bakoitzak duen ordutegia errespetatu behar da.
Pertsonena arteko distantzia mantentzea ezinbestea izango da, eta establezimendu bakoitzak jarraitko arauak errespetatu beharko dira. Udalak langileekin errespetuz jokatzeko eskatu du.
