Euskaraldiaren lanketa martxan jarri eta bi bilera egingo dituzte
Urte bukaeran egingo dute bigarren Euskaraldia, entitateetan zentratuta. Bihar izena ematera animatzeko bilera egingo dute, eta datorren astean bigarren zita.
Euskaraldiaren bigarren ekitaldia urte bukaeran egingo dute, baina Oiartzunen jada martxan dira prestaketa lanak. Aurten entitateak izango dira protagonista nagusiak.
Bihar —hilak 14, osteguna— arratsaldean lehenengo taldeak bilera egingo du, online (esteka honen bitartez egingo dute bilera). Lehen talde hori entitateetan Euskaraldiaren berri ematen eta izena eman dezaten animatzen ariko dira.
Hainbat gai izango dituzte hizpide, tartean balizko formazio saioak, deialdiak nola komunikatu edo koordinazio lanak.
Bigarren taldea, berriz, zabalkundeaz eta ahal diren ekintzak antolatzeaz arduratuko da. Bilera birtuala (esteka berbera izango da) hurrengo ostegunean izango da, 19:00etan. Izen-ematea sustatzeari zein irailetik aurrera egin beharreko jarduera posibleei buruz arituko dira.
Norbaitek zalantzarik badu, Euskaraldiaren Oiartzungo lan taldearen e-posta elektroniko helbidera idatz dezake.
