Oarsoaldeko AEKren euskaltegiek aurrematrikulazio epea zabaldu dute
Oarsoaldeko AEKren euskaltegiek aurrematrikulazio epea zabaldu dute. Uztailaren 8a baino lehen izena ematen dutenek deskontua izango dute matrikulan.
Oarsoaldeko AEK-ko kideak, iazko matrikulazio kanpainaren aurkezpenean. Urrian abiatuko du AEK-k 2020-2021 ikasturtea. Horri begira, Oarsoaldeko AEK euskaltegiek jakinarazi dute jada zabalik dutela aurrez matrikulatzeko epea.
Une honetan euskaltegietako ikasle direnek, edo ikasle berriak, uztailaren 8a baino lehenago aurrematrikulazioa egiten badute %5eko deskontua izango dutela jakinarazi dute AEKtik. Gainera, ordainaldia zenbait epetan egiteko aukera dute.
Oraingoz, aurrematrikula Internetez egin daiteke. Baina luze jo gabe AEK-k espero du aurrez aurreko arreta eman ahal izatea Lezoko Oroitzenen, Antxoko Txirritan, Oiartzungo Intxixun eta Errenteria-Oreretako Xenpelarren.
Martxoaren 12an eten behar izan zituzten Oarsoaldeko AEK-ko euskaltegiek aurrez aurreko eskolak. Ordutik, online ari dira ikasleekin lanean, bakarka zein taldeka.
