Bost establezimendu gehiago batu dira bonuen kanpainara
Udalak martxan jarritako bonuen kanpainan 39 establezimenduk eman dute izena. Oraindik izena eman daitekeela gogorarazi du udal erakundeak.
Aste honetan bertan hasi da herriko ostalaritza eta merkataritza establezimenduak laguntzea helburu duen kanpaina. 34 establezimenduk bat egin zuten bonu kanpainarekin.
Oiartzungo Udalak gaur jakinarazi duenez, beste bost negozio txikik bat egin dute kanpaina horrekin: Lide Cenzano fisioterapiak, Sasi loradendak, Txikierdi Alde tabernak, Txintosta ilea apaindegiak eta Urkola optikak.
Establezimenduen zerrenda 39ra igo da, beraz. Denda edo taberna horietan 30 eurogatik eros daitezke bonuak, eta gero 40 euro gasta daitezke. Udalak egiten du aldearen ekarpena.
Kanpainan oraindik izena eman daitekeela gogorarazi dute. Horretarako, e-posta bidez edo telefonoz deituta (943 49 01 42; astelehenetik ostiralera, 08:30etik 14:00etara). Kanpainarekin bat egin duten komertzio guztien zerrenda ikus daitezke esteka honetan sakatuta.
