Manuel Lekuona biblioteka irekiko dute, maileguetarako
Asteazkenetik aurrera egin ahal izango dira maileguak. Harrera bakarrik egongo da irekita, eta segurtasun neurriak hartuko dituzte. Mailegurako bakarrik irekiko dute.
Liburu eta DVDen hautaketa katalogo bidez egin beharko da. Oiartzungo Manuel Lekuonak ez du bere jarduera eten, baina datorren asteazkenean —hilak 27— ateak irekiko ditu berriro. Mugekin, oraingoz. Liburuak eta DVDak mailegatzeko aukera egongo etzitik aurrera.
Harrera bakarrik egongo da irekita, eta erabiltzaileek liburuzainei eskatzen dieten liburu edo DVDa bakarrik jasoko dute. Hori egiteko, erabiltzaileek katalogoa kontsultatu beharko dute, eta hainbat bide izango dituzte horretarako. Telefonoz (943 49 38 64; 13:00etatik 16:00etara deitzeko gomendatu dute); e-posta bidez; katalogoen webgunetik, edo aurrez aurre.
Bazkideek banaka joan beharko dute jasotzera. 14 urtetik behera dituztenak, berriz, heldu batek lagunduta joan daitezke mailegua egitera. Bibliotekara sartzean, maskara jarrita eraman beharko dute erabiltzaileek, eta bertan egongo den gel hidroalkoholikoaren garbitu beharko dituzte eskuak. Bi metroko segurtasun tartea ere errespetatu beharko da.
Gainerako zerbitzuak, itxita
Itzulketak buzoian edo harrerako saskian egin beharko dira. Liburu edota DVD horiek hamabost eguneko koarentena pasatu beharko dute, berriro mailegatu aurretik.
Igogailua ezingo da erabili, behar bereziak dituztenek izan ezik. Biblioteka berriro irekitzeko fase honetan, egunkariak irakurtzeko aukerarik ez da egongo, eta Ikasle Gelak zein ordenagailuen aretoak itxita jarraituko dute. Gainera, bertan irakurtzeko edo kontsultak egiteko itxita jarraituko du bibliotekak.
Neurri horiekin guztiekin, Manuel Lekuona biblioteka toki seguru izatea nahi dute liburutegiko arduradunek zein Oiartzungo Udalak berak. Neurri horiei buruzko edozein zalantza izanez gero, liburuzainei galdetzeko gomendatu dute.
