Gizon bat atxilotu dute Lezon, emakume bati eraso egiteagatik
Gizon bat atxilotu dute Lezon, emakume bati eraso egiteagatik. Ertzaintzak gizona atxilotu, eta gaur goizean eraman dute epailearen aurrera.
Atzo (astelehena) arratsaldean Ertzaintzak 41 urteko gizon bat atxilotu zuen Lezon, emakume bati eraso egiteagatik. Erasotzailea emakumearen bikotekide ohia da. Segurtasun Sailak jakinarazi du “genero indarkeriagatik” eta “bide segurtasunaren kontrako” jardunbideagatik atxilotu egin zutela gizona. Gaur (asteartea) eraman dute erasotzailea Donostiako Guardiako Epaitegira. Ostegunean elkarretaratzea egingo dute erasoa salatzeko.
Segurtasun Sailak zehaztu duenez, Donibanetik Lezorako bidean autoan zihoazela eztabaida hasi zuten gizonak eta emakumeak (emakumea zen gidaria). Horretan ari zirela, gizonak bolantea hartu eta kontrako noranzkoko erreian jarri zuen autoa. Ondoren, gidariak Lezoko herrigunean gelditu ahal izan zuen autoa, eta orduan gizonak autoko giltzak hartu, eta emakumea erasotzeari ekin zion. Ordurako jada Lezoko Udaltzaingoa bertan zen.
Geroago iritsi zen Ertzaintza; bi pertsonak identifikatu, eta gizona Errenteriako Ertzain-Etxera eraman zuten atxilotuta.
