Udaletxean aurrez aurreko harrera egiten hasiko dira bihar
Osasun neurri guztiak hartuko ditu Oiartzungo Udalak. Horregatik, lehenik txanda eskatu beharko da, eta hainbat muga izango ditu oraindik.
Udalak zabaldutako argazkian ikus daiteke prest daudela herritarrei harrera emateko. Bihartik —hilak 27, asteazkena— aurrera udaletxea herritarrei irekiko zaie berriro, beharrezko prozedura administratiboak egiteko. Udalaren zerbitzuak aurrez aurre irekita egongo dira berriro, baina ez konfinamendua baino lehenagoko baldintzetan.
Aldez aurretik txanda eskatu beharko da, 943 49 01 42 telefono zenbakira deituta. Dagokion sailaren telefono zenbakira ere deitu ahal izango da (hemen ikus daiteke kontaktuen zerrenda). Herritarrentzako zein udaleko langileentzako eurentzako segurtasun neurriak hartu ditu udalak.
Harrera gune guztietan gel hidroalkoholikoa jarriko dute. Igogailua beharrezkoa denean bakarrik erabili ahal izango da. Banaka erabili behar izango da, mugikortasun arazoak dituztenek izan ezik. Horiek lagunduta erabil dezakete. Gainontzeko toki itxietan bezala, herritarrek maskara erabili beharko dute, eta segurtasun distantziak mantendu. Langileak babesteko pantailak ere jarriko dituzte.
Honakoa sailek irekiko dituzte ateak, bihartik aurrera: Erregistroa, Gizarte zerbitzuak, Hirigintza, Hondakinak, Idazkaritza, Kontu-hartzailetza eta Mendi-Ingurumen sailak.
