Aldundiak bat egin du asteleheneko eraso matxista salatzeko elkarretaratzearekin
Aldundiak bat egin du asteleheneko eraso matxista salatzeko elkarretaratzearekin. Bertan izango da foru erakundeko ordezkari bat.
Gipuzkoako Foru Aldundiak erakunde adierazpena egin du gaur, astelehenean Lezon izan zen eraso matxistaren harira. Batetik, bat egin du bihar (osteguna) 18:30ean Gurutze Santuaren plazan egitekoa den salaketa elkarretaratzearekin. Bestetik, elkartasun osoa adierazi dio erasotua izan zen emakumeari, nahiz haren gertuko lagun eta senitartekoei. Bertan izango da Miren Elgarresta Berdintasuneko foru zuzendaria.
Aldundiak adierazi du tankera horretako erasoen oinarrian emakumeen eta gizonen arteko berdintasun falta dagoela, eta emakumeak kontrolpean izan nahi dituzten jarrera matxistak azaleratzen direla. “Gizon eta emakumeen berdintasuna, pertsonen duintasuna, askatasuna eta integritate fisikoa eskubide urraezinak dira, eta eskubide horien kontra egiten duten jarrerak erabat gaitzesgarriak, bidegabeak eta onartezinak dira”, esan dute foru erakundetik.
Pandemia eta deseskalatze egoeran bortizkeria matxistaren aurkako konpromisoari eusteko eskatu du aldundiak, “inoiz baino gehiago erne jarraitzeko, biolentzia jasaten duten emakumeek erakundeon eta komunitate osoaren babesa jaso dezaten”.
Aldi berean foru erakundeak oroitarazi du biolentzia matxistaren biktimentzako zerbitzu eta egoitza guztiak indarrean daudela. Haiekin harremana egiteko telefono zenbakia 900 840 11 da. SOS Deik zerbitzuaren 112 aplikazioak, deirik egin gabe, emakumeei laguntza eskaini diezaieke: GPS bidez lokalizatzeko aukera ematen du aplikazioak hala eskatuz gero.
