COVID-19ak hildakoak eta haien gertukoak gogoan izan ditu plenoak
COVID-19ak edo pandemia garaian hildakoei eta haien gertukoei omenaldi ekitaldia eskainiko die udalak, horretarako baldintza egokiak ematen direnean.
Telematikoki egin zuten plenoa atzo. Ez ohiko moduan egin zuten atzo arratsaldean hileko ohiko plenoaren saioa. COVID-19ak markatutako agendaren barruan, udalbatzak ere funtzionatzeko moduak moldatu behar izan ditu, eta segurtasuna eta osasuna bermatze aldera modu telematikoan egin zuten atzo saioa. Hasierako arazo batzuk gaindituta, lortu zuten saioa osorik egitea eta bozkatu beharreko guztiak bozkatzea.
Gaiekin hasi aurretik, ordea, Aizpea Otaegi alkateak aipamen berezia egin zien, aitortza, COVID-19ak hildako errenteriarrei, eta haien senide eta lagunei, baita birusek horrek ez, baina pandemia garaian beste patologiek eraginda hil direnei eta haien gertukoei. Lehenengo aldia zela atzokoa, osasun larrialdia ezarri eta konfinamendua hasi zenetik, udalbatza, telematikoki bada ere, elkartzen zela ekarri zuen gogora, eta une egokia iruditu zitzaion hildako horiek guztiak gogoan izan eta haien gertukoei elkartasuna adierazteko. Garaiaren gogortasunean jarri zuen azpimarra alkateak: “Ezinbestekoa da maite ditugunak behar bezala laguntzea, babestuta egotea, joaten diren horiek lagunduta egitea eta dolua egin behar dutenek babesa sentitzea”.
Pandemiaren harira ezarritako neurriek, ezinezkoa egin dute hori, eta bakarrik, gertukoak, maite dituztenak ondoan izan gabe hil dira; bestaldean, senide edo lagunen bat galdu dutenek, haiek agurtzeko, besarkatzeko aukerarik gabe eta dolua besarkada eta musurik jaso gabe egin behar izan dute. Ez da erraza hori baino gogorragoa izan liteken egoera irudikatzea.
Oraindik ere ez dagoela aukera behar bezala egiteko nabarmenduta, horretarako baldintza egokiak ematen direnean, joandako horiei guztiei eta gertukoei ekitaldia eskainiko diela udalak hitz eman zuen Otaegik, “gaurkoa, plenoa hasi aurreko hitz hauek omenaldi xume izan nahi dute, agurra joan direnei, eta besarkada senide eta lagunak galdu dituzten horiei guztiei”.
