[Galeria] Bigarren fase eguzkitsuarekin gozatzen
Eguraldi onak lagunduta, jendetza ateratzen da kalera. Maskarak nagusi dira, eta bi metroko tartea errespetatzea oso zaila egiten da toki batzuetan.
Kolorea berreskuratu dute kaleek. Arratsaldea da, udaberria da eta eguraldi ona egiten du. Begi bistan diren gauzekin jarraituta, herritarrek kalea hartu dituzte. Baina azken hori albiste da, kontuan hartuta orain dela lau aste ezin zela —ia— etxetik atera.
Errenteria-Oreretan jende gehien ibiltzen den tokietan herritar asko dabiltza goitik behera, asko terraza baten bila. Taberna askok oraindik ez dituzte ateak ireki, eta eserleku bat topatzea Grial Santuaren mailan jartzen da.
Bigarren fasean, mugitzeko askatasun handiagoa izateak toki batzuk hutsarazi eta beste batzuk bete ditu. Niessen merkatalguneko supermerkatuan, arratsaldetan behintzat, ez da lehengo ilara distopikorik ikusten. Plaza eta parkeak haurren alaitasunez betetzen ari dira, baina kulunkek herdoiltzen jarraitu beharko dute. Fanderiako eta Gabierrotako paseatzeko bideetan fluxua txikiagoa da. Agian sasoiko jartzea aitzakia bat besterik ez zen…
Itxita jarraitzen dute zinemek. Fizkziozko espia batek zaintzen du Niessengo eskailera, eta filmaren izena ezin egokiagoa da COVID-19aren garairako. Kontua da oraingo heroiek ez dutela bermuta eta vodka nahastuta, ez irabiatua eskatu eta smoking bat janzten, bata zuria baizik.
