COVID-19aren biktimak gogoan egin dute maiatzeko plenoa
Koronabirusaren biktimen omenezko minutuko isilunea egin du Udalbatzak. Besteak beste, kirol elakrteei diru laguntza aurreratu diete.
EH Bilduko bost zinegotzi —irudian— eta EAJko bi hurbildu ziren udaletxera, quorum-a egon zedin. Oiartzungo Udalbatzak maiatzeko plenoa egin zuen atzo. Minutu bateko isilunearekin hasi zen, Eudelek egindako deia bere eginez. COVID-19ak eragindako biktimak omentzea zen helburua.
Apirilean bezala, atzo zazpi zinegotzi bakarrik izan ziren pleno aretoan, segurtasun neurriak betetze aldera. Gainontzekoek telematikoki hartu zuten parte.
Alkate dekretu baten berri eman zuten lehendabizi. Zehazki, COVDI-19ak sortutako larrialdi ekonomiko eta sozialari aurre egiteko zergen egutegia moldatzeko alkate dekretua izan zuten hizpide.
Esleipenak eta diru laguntzak
Hondakinen bilketa eta hiri garbiketa zerbitzuak esleitzea adostu zuten. FCC Medioambientek egingo du, hiru urtez (beste bi urtez luzagarria izango da). 1.261.957,95 euroan esleitu da kontratu hori. Beste hautagai bat ere bazegoen, baina enpresa horrena hobetsi dute. EAJ abstenitu egin zen.
Beste hitzarmen bat ere onartu zuten, aho batez: Ergoien, Gurutze eta Karrika auzoei zerbitzua ematen dien taxibusa beste urtebetez luzatzearena.
Herriko ikastetxeekin hitzarmena eta diru laguntza onartu zuten, Eskola Kirola kalitatezkoa emateko. Horrela, Eskola Kirola, Muittu! eta Eskola Kirolako koordinazio jarduerak aurrera eman ditzakete.
Bestalde, COVID-19ak eragindako kalteak arintze aldera, herriko kirol elkarteei bideratzen zaien diru laguntzaren erdia aurreratzea adostu zuten, guztien adostasunarekin. Sei elkartek jasok dute laguntza hori.
Horrez guztiaz gain, urtero hartu beharreko erabaki bat izan zuten mahai gainean: datorren urteko herriko jai eguna ezartzearena. Ohi bezala, abuztuaren 3an izango dira.
Bonuak, hizpide
Galdera eta eskarien tartean, EAJko Janire Mitxelenak herriko komertzioa eta ostalaritza sustatzeko bonu kanpaina aipatu zuen. Azalera handiko merkatalguneen barruko denda txikiek parte hartzeko oinarriak aldatzea eskatu zuen. Kanpainaren alde zeudela baieztatu zuen, hori bai.
Jexux Leonet alkateak azaldu zuen herrian eta auzoetan dauden establezimenduak sustatu nahi izan dituztela, “ez dutelako bezeroen bermea. Bonuekin herritarrei ematen diegu laguntza eta kontsumoa bideratu nahi dugu”. Proposamena kontuan hartuko dutela erantzun zion Mitxelenari.
Alkateak iragarri zuen COVD-19ak eragindako kalteak arintzeko diru laguntzak prestatzen ari direla. Fakturazio jaitsi zaien establezimenduak izango dira onuradunak, eta herrigunean, auzoetan zein merkatalguneetan egon, denek izango dutela eskatzeko aukera.
