[Bideoa] "Haserrea eta amorrua baino ezin dugu sentitu"
Astelehenean eraso zuten emakumea babesteko eta indarkeria matxista salatzeko elkarretaratzea egin zuten atzo Lezon. Haserrea eta amorrua, plazako sentimenduak.
Gurutze Santuaren plazako irudia, atzo.
Atzo arratsaldean, astelehenean erasotua izan zen emakumea babesteko eta indarkeria matxista kasu hori eta guztiak “kasu isolatu” ez direla adierazteko elkarretaratzea egin zuten Gurutze Santuaren plazan. Egoerak eskatzen duen segurtasun neurriak (aforoa, distantzia…) betez egin zuten mobilizazioa, hamarnaka lezoarren parte hartzearekin. Tartean ziren herriko alderdi politikoetako ordezkariak, baita aldundikoak ere. “Haserrea eta amorrua baino ezin dugu sentitu”, esan zuten megafoniatik elkarretaratze isilak bidea egiten zuen bitartean. Erasoa jasan zuen emakumeari “elkartasunez beteriko besarkada” bidali zioten.
Gaxuxa Emakume Taldeak eta Lezoko Emakume Taldeak sinatutako oharra izan zen atzo bozgorailutik herrira zabaldu zena. Eraso matxistak kasu isolatuak ez direla azaldu zuten testua irakurri zutenek, “emakumeen kontrako erasoak izebergaren punta dira”. Indarkeria matxistaren atzean sistema oso bat dagoela nabarmendu zuten, alegia, askotariko itxura eta mezuak dituela, eta eredu bakar baten aldeko hautua egiten duela: emakumeak jendartearen esparru guztietan zapalduak mantentzea.
Lezoko emakumeek garbi esan zuten atzo ez dituela inork oin azpian hartuko, “indarkeria sexistari aurre egiteak harreman eredu hori eraldatzea exijitzen digu”. Eta eraldaketa bide horretan tresnak izatea beharrezkotzat dute. Hala ere, borrokari eusteko prest dira: “Gu prestatzen ari gara, elkarrekin indartsuago egiten ari gara, inposatu diguten emakume eredua apurtzen ari gara, ez gara sumisak, ezta biktimak ere. Geure burua defendatzeko gai gara, eta ez daukagu beldurrik. Erantzuteko prest gaude”.
Elkarretaratzearen bnukaera, isiltasunak txalo zaparradari eman zion bide. Ondoko bideoan une hori dago.
