Mahai gehiago baimenduko dituzte terrazetan, baina tamainan
Ostalaritza establezimenduei aurrera egiten lagunduko dien neurriak hartu dituzte, baina herritarren espazio publiko eskubideak errespetatuz.
Eneko del Amo zinegotzia (ezkerrean) Ostariko kideekin.
COVID-19ak sortutako larrialdi egoerak ekonomian kalte handia eragin du. Gehien pairatu duen sektoreetako bat ostalaritzarena da. Ekonomia suspertzeko bide horretan, udalak ostalaritzarentzako protokoloa sortu du, Ostarirekin batera. Herriko 30 establezimendutik gora daude elkarte horretan antolatuta.
Protokoloarekin oreka bilatu nahi izan dute. Alde batetik, taberna eta jatetxeei laguntze aldera, kalean mahaitxoak jartzera ahalbidetuko die. Bestetik, herritarrek espazio publikoa erabiltzeko duten eskubidea bermatuko du protokoloak.
Protokolo hori aurkeztu dute gaur eguerdian, Errenteria-Oreretan metro koadroko ostalaritza establezimendu gehien dauden tokian: Gamon Zumardian. Udalaren aldetik Eneko del Amo Garapen ekonomikoko zinegotzia izan da bertan, Ostariko hiru ordezkarirekin batera.
“Bizikidetza hori bermatzeko, beste urrats garrantzitsu bat ere eman da, tabernek beren lokaletan jarriko baitute zenbat mahai jar ditzaketen”, azaldu dute.
Protokoloaren xehetasunak
Irekiera orduei dagokienez, taberna eta terrazek ohiko ordutegia berreskura dezakete, gauetan izan ezik. Izan ere, gauez irekitzeko baimena dutenek, ezingo dute 3 fasera arte ezingo dute gauez ireki.
Terrazei dagokienez, establezimenduek alarma egoeran baimendutakoak baino mahai gehiago jartzeko aukera izango dute. Hori bai, eskaera egin beharko dute, eta oinezkoentzako espazioak zein ingurukoak errespetatu beharko dituzte. Baimenduta duten mahai kopurua eta jarri ahal izango dituztenak ikus daitezke koadro honetan.
Mahai kopurua handitu nahi izanez gero, ostalariek udal teknikarien laguntza eska dezakete. Horretarako, Hirigintza Sailarekin edo ZU! herritarren arretarako udal bulegoarekin jarri beharko dira harremanetan.
Mahai kopurua handitzeko eskaerarik egiten ez bada, mahaien erdia bakarrik jarri ahal izango da. Horrez gain, ostalaritza establezimenduek ezingo dituzte beste hainbat elementu jarri, hala nola itxaroteko mahaiak, upelak edo pasabidea eta irisgarritasuna eragozten dituztenak.
Ostarik protokoloa balekotzat eman du. “Orain arte erabiltzen dugun mahai kopurua handitzea ahalbidetuko du”, zehaztu dute. Terrazen erabiltzaileei egoera zein den ulertzeko eskatu diete. Laguntza ere galdegin diete, ostalariek euren lana ahalik eta ondoen egiteko.
Azkenik, ostalarien erantzukizuna eskatu dute, egoera delikatua denean arauak bete ditzaten.
